Women’s Club of Aruba ta recorda su miembro stima Miss Pearl Cromarty

E noticia tabata duro, doloroso y hopi tristo en berdad pa e miembronan di Women’s Club of Aruba (WCA). El a bin inespera pa mayoria, e noticia di e fayecimento di nan miembro Pearl Cromarty. A comparti tristeza y a basha algun lagrima.

“Su presencia na nos General Membership Meetings (GMMs) a wordo sinti grandemente, pasobra su asistencia tabata leal tur luna. E tabata stima pa tur miembro!

Miss Pearl Cromarty, naci na october 1932, a bira miembro di WCA na aña 1985. Su boluntarismo tabata semper continuo y su amor pa nos grandinan a hib’e pa bishita nan pa hunga bingo of na cualkier evento unda su ayudo ta wordo pidi.

Miss Pearl a haci su parti bendiendo ticket pa cualkier proyecto di recaudacion di fondo di e Club y tabata remarcabel cu semper e tabata esun cu a bende mas ticket compara cu otro miembronan.

Miss Pearl no por a atende tur GMM durante e añanan cu e tabata trahando, pero asina cu el a yega e edad pa pensioen, e tabat’ey tur luna. Ta e ora ey el a sirbi den e Board como Presidente di Ways and Means na 1995-1996.

Den e aña ey tambe el a join e grupo cu tabata bayendo pa atende e Convencion di The General Federation of Women’s Clubs (GFWC) na Nashville, Tennessee. El a pasa hopi bon, a disfruta di e convencion y e grupo a disfruta di su compania. E tabata un dama hopi lief! Hopi educado y humilde!

Miss Pearl tabata pertenece na e coro di Iglesia Protestant y pa e motibo aki a wordo pidi pa canta nos Ode na cada GMM, locual e tabata gusta haci. Den e Aña di Club 2015 Miss Pearl a wordo otorga Life-Membership, como cu el a yega e edad di 80 aña y ta un miembro activo pa mas di 30 aña, segun nos Constitucion y Bylaws.

Miss Pearl sigur tabata hopi agradecido na su amiganan cu a cuida bon di dje, dunando lift pa e GMMs y bishitand’e riba su cumpleaños y hopi biaha pa check con e tabata bayendo salud: Adelaida, Myrna, Ursly, Diana, Mary Droogh, Rita, Greta y Lilla.

Miss Pearl a wordo scogi na 2017 como e Prome Reina di Carnaval di nos Club y kere nos, el a pasa hopi dushi cu esey y na final di su reinado el a menciona con lihe e aña a pasa y ya caba e mester pasa e corona pa un otro dama.

Awo na e edad di 91, Miss Pearl a tuma un biahe sin regreso y laga nos tur den lagrima y tristesa! Con lihe tempo ta pasa y nos ta agradecido pa conoc’e y tin’e den nos historia di WCA y su recuerdo nan dushi y bunita lo trece nos algun consuelo.

Sosega na Paz nos miembro stima Pearl.

Nos mas sincero condolencia na famia, amigo y na tur nos miembronan!”