Connect with us

Wever na Arends: Bo ta mescos cu nan!

Aruba

Wever na Arends: Bo ta mescos cu nan!


Durante reunion di 10 di november ultimo tocante Serlimar, a bira mas cu obvio cu bou tur circumstancia kier sigui proteha esun cu a masacra Serlimar. 

Minister Arends, cu riba papel supuestamente ta encarga cu integridad, no solamente a sigui proteha e autor intelectual di e masacre di Serlimar, pero su actuacion den Parlamento a mustra claramente cu el a sigui como ‘de beste jongetje in de klas’ e lesnan di con pa DESINFORMA nos pueblo y masha liher mes demonstra cu NOS TA MESCOS CU NAN. 

E minister encarga politicamente cu Serlimar a culpa tur ex-ministernan pa e situacion di Serlimar, cu excepcion di Otmar. Pio ainda, NINGUN momento a tribi ni di uza su nomber. En cambio esun di mi si el a haya bon pa uza, bisando cu un di e factornan pakico Serlimar ta den e situacion cu e ta awor, ta pasobra e Raad van Toezicht a cuminsa traha te na 2008. Pero mi por bis’e cu e motibo principal di esaki tabata cu tanto gremio comercial como sindical a tarda pa apunta un representante den e RvT.

Ta bon conoci cu e director di e tempo ey, cu por cierto a nombr’e despues di un proceso transparente di un solicitud habri, a fungi manera e ley ta prescibi, esta conforme e reglanan di Corporate Governance! Of minister Arends kier insinua cu e director aki a haci su mes culpabel di mal maneho? No ta e mesun minister cu Arends kier proteha, a dun’e un plakaat como reconocimento como un director intachabel? Of Arends tin informacion contrario awor?

Ursell Arends kier bin bisa cu e.o. mi persona NO a cumpli cu e meta pakico e compania estatal Serlimar Sui Generis a ser institui, esta dor di no cobra! Ta bon pa sr. Arends sa cu a cobra, pero no pa tur servicio. Loke nos a haci ta, cumpliendo cu deseo di Parlamento, pa gobierno sigui subsidia te ora cu Serlimar duna e servicio optimal y alabes ‘verwerk’ e desperdicio recohi! 

Di unda Arends ta yega na e conclusion cu esaki ta un di causanan cu Serlimar ta den e situacion aki, ‘mag Joost weten’! Aki un biaha mas ta mustra dede tur caminda y riba otro hende, pero e destructor principal di Serlimar, Otmar y su prome consehero,  ta ser proteha, door di keda keto riba e corpucion cu a tuma luga na Serlimar. Porcierto e documentacionnan cu mi a manda pa Arends, como minister encarga cu Serlimar.

Spencer Johnson a yega di bisa: ‘Integrity is telling myself the truth. Honesty is telling the truth to other people’! Cu otro palabra integridad ta sa e diferencia entre bon y malo y por bisa e berdad na bo mes. Hende sin integridad ta recuri na gañamento y no lo bisa e berdad na otro hende tampoco. Esaki pa mi kiermen tambe cu hopi biaha esnan cu tin boca yen di integridad, juist tin problema pa papia e berdad.

Y ni 50 dia den gobernacion, Ursell Arends a recuri na esaki caba, pasobra simplemente e ta GAÑA ora cu e ta bisa cu e incinerator chikito ta traha bon. Y cu esaki ya ta un alivio completo pa e bario.

Den un otro articulo lo bay na desenmascara e mentira aki, cu Ursell Arends a bin ta bende den Parlamento, na e habitantenan di e vecindario di Parkietenbos y tambe na nos pueblo. Pasobra mientras mi ta trahando riba e articulo aki, ayera ainda huma tabata sali for di dump y pa mi no por ta di e incinerator.

Un incinerator cu ta un ‘miskoop’, cu no ta funciona, y cu ta hole na corupcion.

Tambe Ursell Arends kier bin bisa cu nunca tabata tin un plan integral pa un solucion duradero y sostenibel pa e problema di desperdicio! Wel Ursell Arends mi no sa ken bo kier defende aki, pero bo por puntra e director di DNM, cu bo a core saca potret cu ne, pa e duna bo e documento cu e MES a yuda traha. E tempo ey e director tabata bisa cu e bandera di Aruba so  e tabata sirbi. Den e plan integral ey e WasteAwayplant di Bouldin & Lawson tabata forma parti, cu esun cu bo ta pone man riba su cabes esta Otmar a yuda boycotea y percura pa desmantela esaki, pa haya espacio pa hinca e incinerator chikito (porkeria) aden. Esaki no ta storia pero historia. (FACT). No solamente ta keda hiba un maneho adhoc, manera cu ta sosode den e caso di WEB y SETAR, pero ta sigui trata na tapa solo cu un dede, pasobra NOS a para bira mas NAN cu NAN mes. Ta ignora e corupcion cu a tuma luga cu e incinerator chikito y awor kier hasta ignora esnan cu a denuncia falta di maneho cu dump, entre otro door di e partner den coalicion den persona di e prome minister. Y esaki sigur lo no trece solucion, al contrario esaki lo haci bo parti di e problema! Ni cuanto bo purba di desvia e atencion, e FACT aki lo sigui persigui bo. Awor ta e momento pa bo demonstra cu BO NO TA NAN!

Parce cu e stoel di minister ta basta comodo, pasobra Arends ya caba a acepta cu su partido no tin nada di bisa den e gobernacion actual. RAIZ liher a prefera di asumi e rol di marioneta, guli manda abou loke e Prome Minister bisa y manda, y recuri na gañamento pa proteha esun cu ta dirigi gobierno keto bay. Un prueba palpabel ta con RAIZ for di un inicio a bay di acuerdo pa acepta un “REST-PAKKET “!





Source link

Click to comment

Leave a Reply

Your email address will not be published. Required fields are marked *

More in Aruba

To Top