Web Aruba ta introduci sistema nobo di administracion di cliente: Number di Percela ta cambia pa Account Number

E acostumbrado ‘Number di Percela’ ta cambia pa ‘Account Number’ di 10 cifra pa tur cliente di WEB Aruba, tanto residencial y comercial. Esey ta e cambio mayor cu clientenan lo ripara di e sistema nobo di administracion di cliente, cual WEB Aruba a introduci dia 4 di november ultimo. Cu un acto simbolico, director di WEB Aruba den presencia di empleadonan di departamentonan envolvi a duna e señal oficial. Esaki a efectua despues di un trayecto largo di preparacion, testmento, implementacion y training. Hunto cu e sistema nobo, e compania di awa a lansa e portal di WEB Care totalmente modernisa. E sistema nobo di administracion di cliente tawata necesario pa motibo cu e sistema bieu no tawata cumpli mas cu exigencianan contemporaneo.

Account Number
E mayor cambio pa e clientenan cu un conexion di awa, ta cu e number di percela ta stop di existi y na su lugar ta bini e Account Number di 10 cifra. P’esey a introduci e sistema cu e lema ‘Nos ta bay pa un 10!’. Por reconoce e Account Number nobo na su 10 cifra y na e hecho cu e no tin strepi meymey manera tawatin den e number di percela. E Account Number ta importante ora di paga e cuenta di awa of pa comunica cu WEB. Cada Account Number ta mara na un conexion di awa y e ta sigura cu WEB su sistema nobo di administracion por procesa pago rapido y corectamente.

Portal nobo WEB Care
Hunto cu e sistema nobo a lansa e portal nobo di WEB Care. E portal di WEB Care tawata existi caba y ta duna un bista cla di e cliente su consumo di awa y su historia di pago. E portal a keda completamente modernisa. Usuarionan di e portal existente di WEB Care mester registra di nobo, cu e mesun adres di e-mail. Usuarionan nobo tambe por registra, yamando Call Center di WEB pa inscribi nan adres di e-mail. Ta haya mas informacion riba webaruba.com.

Gradicimento
Aunke empleadonan a train cu e sistema nobo, ainda e servicio lo por ta un tiki slow, ya cu nan tin cu custuma cu e sistema. P’esey WEB ta gradici comunidad pa nan comprension y pasenshi. Gerencia di WEB ta felicita e grupo di proyecto y tur colega di ICT y sector di Distribucion di Awa & Customer Service. Un aprecio grandi pa nan esfuerso y motivacion pa a siña con e sistema ta traha, pa duna input con e lo por traha cu data di WEB y finalmente train, train y train pa traha optimalmente cu e sistema.

DiTra
E sistema nobo di administracion di cliente ta forma parti di proyecto DiTra (Digital Transformation). Cu e proyecto aki lo yega na un aplicacion den Cloud, centralisa y integra den un solo plataforma pa sostene procesonan primario y secundario di WEB su organisacion. E ta encera optimalisacion di sistemanan, pero tambe digitalisacion di trabounan cu tawata sosode manualmente. E proyecto lo optimalisa experiencia di cliente, alinea operacion (operacion y ICT) pa reduci gasto y provee informacion real-time, preciso y transaccional y reportahe pa on-going performance management.