Connect with us

Wardakosta ta detene boto ku trinta persona indokumenta na bordo

Korsou

Wardakosta ta detene boto ku trinta persona indokumenta na bordo


Ayera nochi Wardakosta a detektá un boto sospechoso ku tabata nabegá den
direkshon di Kòrsou. E boto, un tipo di boto yamá yola tabata nabegando di parti sùit den direkshon di Kòrsou. E Sentro di Operashon Marítimo di Wardakosta mes ora despues di e detekshon aki, a dirigí un Metal Shark na e sitio kaminda e boto tabata. Na bordo di e boto sospechoso e agentenan di Wardakosta a enkontrá un grupo di indokumentado i un kacho. E boto i e personanan a keda hibá na e pir di Wardakosta na Parera, despues esnan indokumentá a keda entregá na Kuerpo Polisial di Kòrsou.

En total 30 persona ku nashonalidat Venezolano, di kua 10 dama i 20 hòmber inkluso un menor di edat, a keda detené riba e boto. E kacho a ser entregá na Veterinaire Dienst di Kòrsou.

Wardakosta lo keda intensivá su kontròlnan riba laman. E kontròlnan aki ta dirigí riba protehá i vigilá e fronteranan kontra transporte ilegal di droga, migrashon ilegal, trafikashon di hende i kontrabanda di arma. Pa por protehé nos awanan teritorial i kostanan na un forma optimal nos ta pidi yudansa di siudadanonan. Komo siudadano alerta bo por informá Wardakosta na momentu di detektá un situashon sospechoso òf peligroso riba laman. Wardakosta ta asesibel di dia i anochi via e number 913 of via whatsapp 510 0913.



Source link

More in Korsou

To Top