Connect with us

Ursell Arends: Cas Marie su localidad Mama Ties ta pa brinda calidad halto den cuido

Caribe

Ursell Arends: Cas Marie su localidad Mama Ties ta pa brinda calidad halto den cuido


WhatsApp Image 2024 07 10 at 2.19.50 PM

Cas Marie, e centro di encuentro pa persona cu demencia na Aruba cu hopi orguyo a habri nan localidad nobo,’ Cas Marie na Mama Ties’, situa den bario di Santa Cruz. E gran logro aki tabata celebra cu un apertura oficial diamars 9 di juli den presencia di Minister di Asunto di Grandinan, Ursell Arends y demas invitado.

Un palabra di gradicimento grandi ta bay pa Famia Croes y Fundacion Mama Ties cu a facilita pa nos por yega na e bunita localidad Mama Ties y tambe pa organisa e anochi di apertura. Un anochi caminda tur invitado a sinti e aprecio grandi pa locual Fundacion Mama Ties a haci pa nos comunidad, specialmente pa persona cu demencia y nan famia.

Nos vision cu localidad Mama Ties ta pa sigui brinda un calidad halto di cuido y guia den un ambiente dushi di cas. Un ambiente di amor y dedicacion cu ta simbolisa e amor cu defunto Mama Ties semper a brinda na su sernan keri. A adapta e cas pa por crea diferente espacio. Cada un cu su ambiente specifico caminda nos cliente por distrai su mes, combersa, activa e mente of relaha y disfruta di locual e ta wak rond di dje. Nos ta enfoca riba un ambiente hogareño y atractivo cu detayenan bunita cu ta yuda stimula combersacion y pensamento critico. Tur esaki cu e meta pa mantene mas cu por e habilidadnan di nos cliente. Hunto cu Fundacion Mama Ties a logra crea un otro joya mas y nos kier invita tur persona cu ta diagnostica cu e sindroma di demencia of cu ta cuida un persona cu demencia pa tuma contacto cu nos si mester di guia of informacion.

WhatsApp Image 2024 07 10 at 2.19.50 PM

Cas Marie ta un pasadia innovativo y specialisa riba e necesidad di e personanan cu demencia. Na Mama Ties nos lo brinda e siguiente servicionan:

– Actividad fisico den forma di deporte/ wega/ movecion adapta na e posibilidadnan di cliente.

– Actividad social y recreativo.

– Actividad uzando arte, musica y baile.

– Actividad cognitivo pa stimula e mente.

– Un lunch saludabel y un variedad di pasa boca bon balansa.

Tambe nos ta monitoria e funcionamento general di nos cliente, nos ta mantene contacto y guia famia di cerca. Cas Marie ta traha cu specialista di Centro di Memoria y dokter di cas.

Tur esaki nos ta logra danki na un team dinamico, cu ta keda constantemente educa nan mes riba e diferente aspectonan di e cuido y guia specialisa aki. Nos ta sumamente contento y orguyoso cu e apertura di nos di dos localidad y kier recorda y anima tur persona cu ta sinti nan mes perdi cu un diagnosis di demencia, cu nos t’ey. No tin mester di lucha bo so, dal e prome stap y acerca nos. Nos t’ey pa bo!





Source link

More in Caribe

A2Z ADMINISTRATION

AD

To Top