Connect with us

Un golpi duro: Hulanda a intensifica medida anti-COVID

Aruba

Un golpi duro: Hulanda a intensifica medida anti-COVID


Gobierno demisionario lo preta e riendanan entrante diasabra. Un conhunto nobo di medida di Corona p’e proximo tres simannan lo mester reduci e cantidad di infeccion “cu un golpi duro”, segun prome minister Rutte,a durante un conferencia di prensa. Tanto diabierna como diahuebs, a registra mas di 16 mil caso positivo nobo segun RIVM, e cifra mas halto desde comienso di e pandemia.

Prome Minister demisionario, Rutte y minister De Jonge a bisa cu e medidanan ta supuestamente lo reduci e cantidad di interaccion entre e publico. Specialmente den ora di anochi, mester limita e cantidad di momento di contacto.

“Nos tin un mensahe desagradabel. Ta inevitabel cu nos bolbe bek n’e medidanan cu nos a conoce den e fasenan anterior y cu lo afecta tur hende, vacuna of no,” prome minister Rutte a bisa.

TA AHUSTA ORARIO

Comercio y servicio no esencial (incluyendo e profesionnan di contacto manera pelukeria), mester cera pa 6:00 pm. HORECA y comercio esencial, manera supermercado lo cera pa 8:00 pm. Den e sector di HORECA, ta sigui ta obligatorio un Coronapas y e invitadonan mester ta sinta.

E eventonan por sigui, pero solamente te cu 6:00 pm. Tambe ta rekeri un asiento fiho y un confirmacion di e Coronapas. Ta permiti un maximo di 1250 persona den un sala. Teatro, cine y sala di concierto (cu asiento) no ta mara na ceramento anticipa. Tur deporte ta sigui ta permiti, pero sin publico.

Gobierno ta duna conseho urgente pa bolbe traha fo’i cas segun cu por, “esey ta si en caso realmente no tin un otro manera.” Scol por keda habri. Den scol secundario y superior tin un cantidad maximo di grupo di 75 persona pa sala. Ta haci un excepcion pa examen y test.

Ora cu no tin mester di un Coronapas, e personanan mester mantene na e distancia di un meter y mey. Den e luganan aki, tapaboca tambe ta obligatorio. Y un biaha mas, gobierno ta conseha pa ricibi un cantidad limita di invitado na cas, no mas di cuater den un dia.

Cualkier persona cu biba den un cas cu un persona infecta mester bolbe drenta den cuarentena. E regla aki tambe ta aplica cerca e personanan cu ta vacuna.

Ademas, ta haciendo posibel legalmente otro medida. Por ehempel, e Coronapas pronto lo mester aplica tambe den Dierentuin y parkenan di atraccion. Un cambio importante lo ta cu e Coronapas tambe lo ta aplicabel na trabao.

Gobierno demisionario tambe kier pa e empresarionan por scoge entre e admision cu un test negativo di corona of e admision unicamente pa e personanan cu ta vacuna y cu a recupera di Corona. E posibilidad di scoge entre e sistema 2G y 3G solamente por drenta na vigor despues di e aprobacion parlamentario.

De Jonge a papia di un dilema. Tin di compronde cu hende ta sinti nan mes ‘un poco mas obliga’ pa vacuna. “Pero si cu 2G nos por mantene un cafe habri mas tempo of permiti cu un festival continua, e ora nos trabao ta a tuma e decision aki.”

Tweede Kamer lo debati diamars riba e medidanan anuncia diabierna anochi. De Jonge a bisa cu por imagina cu hende ta haya e medidanan nobo aki ta hopi fastioso. “Ta manera cu bo a core un marathon y bo ta casi na e meta. Y e ora ey bo ta haya sa cu ainda falta dies kilometer mas pa core.”

Prome Minister Rutte a señala cu e cantidad di test positivo ta actualmente mas halto cu nunca y cu ya tin cu pospone e operacionnan. “Afortunadamente mayoria di e hendenan ta vacuna. Fuera di esey, e miseria ta incalculabel.” El a pidi tur hende pa pone di nan parti y entre otro cos, cu lo bay observa e medidanan basico manera un bon ventilacion.





Source link

Click to comment

Leave a Reply

Your email address will not be published. Required fields are marked *

More in Aruba

To Top