Connect with us

Un biaha mas: Maria College ta presenta musical “Planta awe, Cosecha mañan”

Aruba

Un biaha mas: Maria College ta presenta musical “Planta awe, Cosecha mañan”


Grupo di Teatro CCCA ( Cultiva, Conserva, Arte y Cultura na Aruba) bou direccion di Ferdinand Franca hunto cu Maria College Mavo, lo ripiti dia 29 di juni 2022 e musical: “Planta awe, cosecha mañan” na Cas di Cultura. E musical aki ta dedica na Vicente Ras cu ta nos baluarte den mundo di musica. En conexion cu e celebracion di 80 aña di Maria College Mavo, a dicidi pa skirbi un parti di e script den e tempo di antes. Con nos hendenan e tempo ey tabata biba, con nan tabata hende cu ta come cuminda di cunucu. Famia tabata hopi importante, religion etc. Tambe a skirbi un parti di e storia den e añanan 60 unda ya e economia di Aruba a cuminsa desaroya cu e yegada di hotel y turismo na Aruba. Ta bon pa nos conoce nos pasado pa nos por biba nos presente cu e enfoke riba e futuro. E di dos parti di e musical ta e futuro di Aruba. Con nos ta biba den futuro, kico ta e temanan cu ta bin dilanti, y con nos por haci e cambionan necesario awor cu nos ta na tempo. Tur e temanan cu ta bin dilanti den e musical ta tema cu nos hobennan ta enfrenta awendia. Loke ta e musica/bailenan a tene cuenta cu e temporada manera folklore, twist/rock, dancehall y hopi mas. Aki nos tin alumno y ex-alumno cu lo baila bou guia di Shaindra Ashby, Crys Pulido y Club di Movimiento. Tur e canticanan ta haci pa reenforsa e periodo. Loke ta e arte visual tambe lo traha riba diseñonan unico y futuristico.

Maria College Mavo ta un scol unda trabou den ekipo ta hopi importante.

Nos lema “I Am Because We Are” ta representa e habilidad di traha hunto. Trahando hunto nos ta yega leu den bida. Nos ta orguyoso di nos team, alumno, ex-alumno, y e mayornan. Antes e zusternan di Dominicanesse tabata siña e muchanan un “jingle”. Maria College College Mavo a bira mulo bou guia di Zuster Meletia cu tabata cabesante na aña 1942 cu tawata un meisjes school. Na aña 1948 Zuster Dorotea a bira cabesante di Sint Maria College. Na aña 1967 Zuster Helene a bira cabesante di Sint Maria College Mulo. Aña 1973 Harry van Putten a bira cabesante y asina a bin un fin na e maneho di soeurnan Dominicanesse. For di e momento ey Maria College no tabata pa mucha muhernan mas, sino pa ambos sexo.

Nos ta recomenda e muchanan bin acompaña pa un adulto y nos ta invita tur  hoben y adulto pa bin presencia e musical aki. E carchi ta solamente 25 florin y ta obtenibel na Cas di Cultura, pero tambe cerca e hobennan di e elenco. Por yama 7309696 of 7331911 pa reservacion y ta haci delivery tambe. Tambe nos kier gradici e sponsornan cu a yuda haci e musical bira un realidad. Tambe nos kier gradici Maria College Mavo, e mayor- y alumnonan cu ta participa. Grupo di Teatro CCCA tin como meta pa prepara hobennan den e Arte Escenico, pa nan por salvaguardia e existencia di Arte y Cultura na Aruba. Tambe pa investiga, documenta y publica loke ta Arte y Cultura di Aruba. Nos ta invita tur ex-alumno di Maria College Mavo, hoben y adulto pa bin presencia e musical y apoya nos talento y produccion local. Nan lo bira nos futuro cantante-, actor- y directornan den futuro.





Source link

More in Aruba

To Top