Connect with us

Torneo di golf caritativo organisa pa Kiwanis Club of Aruba tabata exitoso

Aruba

Torneo di golf caritativo organisa pa Kiwanis Club of Aruba tabata exitoso


Diadomingo 27 di maart, Kiwanis Club of Aruba (KCA), e service club cu ta existi desde 1964, a organisa un tremendo torneo di golf caritativo na The Links at Divi Aruba. E evenemento por a conta cu 19 hole sponsors como patrocinador principal y cu un gran cantidad di hungadonan di golf, e torneo tabata completamente ‘sold out’. 

Cu e fondonan recauda e aña aki, lo haci un donacion na Fundacion Hunga Teca y tambe na e programa Jump 18. Hunga Teca ta un fundacion cu ta fungi como un ‘speel-o-theek’ cu ta fia muchanan coy hunga educativo y alabes ta organisa dianan di wega, unda muchanan hunto cu nan mayornan por siña cu wega. Jump 18 ta un programa multidisciplinario pa combati y preveni obesidad di mucha hunto cu e mayornan, bou guia di diferente profesional medico. 

Vikash Karnani, miembro di KCA y chairman di e fundraising committee ta comenta: “Nos ta extremadamente orguyoso di locual nos a logra post-pandemia. Nos ta gradici tur nos hole sponsors, sponsors di rifa, socionan loyal y tambe e ekiponan di golf cu a yuda nos realisa nos meta y nos ta spera di por yuda lo mas posibel cu e sosten cu nos a ricibi di e organisacionnan fantastico aki”. 

Jokoeza Hooplot, Presidente di KCA, ta añadi: “E torneo di golf ta un di nos eventonan mas importante pa por recauda fondo pa e club anualmente. Nos ta sumamente contento pa mira cu nos evento emblematico tin un sosten grandi y continuo den sector priva y companianan semi-gubernamental. Ademas, tur nos miembronan di KCA, socionan y ekiponan di golf, por a disfruta di un dushi ambiente durante e torneo y e ceremonia oficial di clausura di e evento”. 

E ganadornan oficial di e torneo 2022 ta: 

Best Gross: Team Ortho Clinic Aruba; Patrick Haime, Evan Haime, Zerzinho Croes y Randy Mark Helgers 

Best Net: Team Rasputin; Pierre Rafini, Greg Martis, Giovanni Atencio y Elvin Maduro Longest drive female: Alexandra Ismail-Brown 

Longest drive male: Axl Ismail 

Closest to the pin: Ricky Ingrassia 

KCA ta gradici e socionan aki pa un biaha mas colabora hunto pa sirbi e muchanan di Aruba: Aruba Trading Company pa provee tur bebida; Yrausquin pa provee e premio di Hole-in-One cu tabata un Ford Bronco Outer Banks 2022; The Links at Divi Aruba cu a fungi como anfitrion di e torneo, y Elite

Productions pa e bunita set-up. Tambe KCA ta extende un danki di curason pa e hole sponsors (secuencia alfabetico): Advance HR, Aeropuerto International Reina Beatrix, AIB Bank, AMC Unicon, Arubabank, Arugas, Astec, Atlas Risk Solutions, Banco di Caribe, Complete Logistics, Compliance & Forensic Services Caribbean, Guardian Group, Interport, Nagico Insurances, Payroll Pro HRM, Professional Roofing, RBC bank, Setar, y Stellaris Casino, cu a aporta pa realisa e torneo di golf 2022. 

Kiwanis Club of Aruba ta existi desde 21 di november 1964 y tin como meta principal pa mehora e bida di muchanan na Aruba. Esaki ta wordo realisa door di organisa diferente proyecto pa recauda fondo, trabounan boluntario y proyectonan di concientisacion. Pa mas informacion tocante Kiwanis Club of Aruba por fabor bishita www.kiwanisclubofaruba.org of nos pagina riba Facebook.





Source link

More in Aruba

To Top