Connect with us

Tene cuenta cu e cosnan cu ta obstaculisa nos oracion

Aruba

Tene cuenta cu e cosnan cu ta obstaculisa nos oracion


Oracion ta e base di nos bida. Un bida sin oracion ta manera un auto den neutral, e no ta bay pa dilanti ni tampoco patras.

Un famia cu no tin oracion den nan cas ta tera fertil pa enemigo ataca y trece tur clase di depresion, pasobra no tin defensa, no tin comunicacion cu Dios y cada ken ta biba pa nan mes. 

Pero ora nos ta haci oracion, nos tin di tene cuenta cu nos actitud y con nos ta duna respet na Dios y con nos ta trata cu nos prohimo.

Tene cuenta cu e sigiuente puntonan cu ta obstaculisa bo oracion:

Falta di amor:

Proverbionan capitulo 21 vers 13 ta bisa: Esun cu ta cera su orea pa sclamacion di e pober, e tambe lo sclama y lo no wordo scucha.

Laga nos tene cuenta con nos ta trata nos prohimo , pasobra Palabra di Dios ta bisa pa nos trata nos prohimo manera nos mes, y stima, duna y yuda tur caminda cu nos por.

Orguyo y arogancia ta enemigo di Dios:

Tur locual cu nos ta pidi Dios mester wordo haci den nomber di Cristo Hesus, no ta nos ta dicidi, ta Dios ta dicidi y mas humilde nos ta mas liher nos contesta yega, hende no por comanda, hende tin cu haci peticion na Dios , esey ta e forma corecto pa acerca Dios. Y ora nos haci esey cu gradicimento nos lo sinti paz y esey ta un señal cu nos oracion a wordo scucha (Filipensenan capitulo 4 vers 6+7).

Falta di fe y duda den nos curason:

Hebreonan capitulo 11 vers 6 ta bisa: Y sin fe ta imposibel pa agrada Dios, pasobra esun cu ta bin cerca Dios, mester kere cu E ta y cu e ta esun cu ta recompensa esunnan cu ta busc’E. Esun cu ta duda ta manera ola di lama y un persona asina no por wordo uza pa Dios siendo un persona di curason dobel (Santiago Capitulo 1 vers 5+8).

Desobendencia:

Si bo ta biba den desobedencia di cualkier tipo y specialmente inmoralidad, bo mes ta obstaculisa bo oracion. Proverbionan 10 vers 24 ta bisa: Loke e malbado ta teme lo bini riba dje y deseo di e husto lo wordo duna na dje.

Discordia den famia:

1 Pedro capitulo 3 vers 7 ta bisa: Mescos boso esposonan, biba cu boso esposanan cu comprencion,manera cu un vas mas delicado, como e ta hende muhe y dun’e honor como heredero di e gracia di bida pa boso oracion no wordo stroba. Un hende cu ta trata su esposa malo, bati muhe y trata su yiunan malo su oracion ta wordo obstaculisa.

Falta di pordon:

Den Mateo capitulo 6 ver 12+15, Mateo capitulo 18 ver 21-35 Marco capitulo 11 vers 25+26: Hesus ta splica bon cla cu si nos no pordona, Dios tampoco ta pordona nos y falta di pordon ta un gran obstaculo pa nos oracion, pasobra Hesus ta bisa cu ora nos ta para ta haci oracion si nos corda cu nos tin algo contra un persona nos mester pordona. Un hende cu no ta pordona ta den rebeldia cu Dios.

Falta di reconciliacion;

2 Timoteo capitulo 3 vers 1-9 ta adverti cu nos ta bibando den tempo trabahoso y cu hende lo bira ireconciliabel, wak pa bo mes cuanto famia ta kibra y no kier paz.

P’esey laga nos confesa nos picanan ( Salmo 66: 18) y bini na e trono di Dios cu un curason limpi y Dios cu tin misericordia di nos lo scucha y bendiciona nos.

Sinceramente,

Pastoor Marcel Balootje





Source link

More in Aruba

To Top