Connect with us

Temporada di basketball 2021/2022 a ranca sali

Aruba

Temporada di basketball 2021/2022 a ranca sali


Diabierna anochi a tuma luga apertura di e temporada di basketball 2021/2022, cu a tuma luga na YMCA na San Nicolas.

Tabatin un defile di parti di e ekiponan cu lo participa durante di e torneo aki pa despues continua cu e prome wega den e categoria Junior U18 caminda cu Aruba Jrs. a enfrenta Stealers.

Minister di Enseñansa y Deporte, Endy Croes a efectua apertura di e torneo aki, expresando cu e ta kere fervientemente den deporte. “E ta e vehiculo cu ta yuda forma nos como persona.”

Vice-presidente di Aruba Basketball Bond, Brian van Spaandonk a conta cu ta hopi contento cu por a cuminsa cu e deporte atrobe den e temporada nobo.

E ekiponan a cuminsa train for di augustus caba. Van Spaandonk a splica cu actualmente a cuminsa den tres division, cual ta U14, U16 y U18. Tambe tin otro dos division cual ta Open Class (adulto) y U12 (mini), cual lo cuminsa den luna di januari.

Nan tin dos dia den siman reserva, cual ta diabierna y diasabra, unda cu a parti e divisionnan U16 y U18, cu lo hunga riba un diabierna. U14, U16 y U18 lo hunga riba diasabra tambe.

Tur organisacion di basket por participa den e torneo aki organisa pa Aruba Basketball Bond, van Spaandonk a indica. Tin cinco organisacion cu ta afilia. Lamentablemente no tur organisacion a logra cera un ekipo den cada division. 

Den U14 tin cinco team, den U16 tin tres team y den U18 di tres team cu ta participando den e torneo aki.

Mirando cu e temporada cu a pasa no a haya chens pa cera e temporada, a probecha y a cer’e diabierna mes, unda cu e atletanan a haya nan trofeo.

Por ultimo van Spaandonk a menciona cu nan tin nan programa riba nan pagina di Facebook, caminda un y tur por sigui e torneo aki di cerca y atende e weganan.

Pa loke ta awe diasabra, e prome wega lo cuminsa pa 5:00 pm entre e ekiponan di Stealers 1 y Estrella den categoria U14. Despues pa 6:00 pm ta sigui e wega entre Stealers 2 y Aruba Juniors tambe den categoria U14.

Pa 7:00 pm, lo tin e wega entre Stealers y Estrella den categoria U16 y por ultimo pa 8:30 pm lo tin e wega entre Stealers y Estrella den categoria U18.

Tur e weganan aki lo tuma luga na YMCA na San Nicolas.

Invitacion ta bay pa tur amante di basketball y Aruba en general, pa asisti na e weganan aki y alabes duna e sosten na nos basketbolistanan.





Source link

Click to comment

Leave a Reply

Your email address will not be published. Required fields are marked *

More in Aruba

To Top