Connect with us

Telefon pa Hubentud su mentornan ta bon prepara

Aruba

Telefon pa Hubentud su mentornan ta bon prepara


Educacion ta un di e pilarnan mas importante pa loke ta e manera di opera di Fundacion Telefon pa Hubentud Aruba. Esaki ta encera cu tur aña e mentornan cu ta e personanan cu ta contesta telefon, email y chat na Telefon pa Hubentud ta prepara pa asina aki por duna nos mucha- y hobennan bon guia, sosten y informacion. Tur aña Fundacion Telefon pa Hubentud Aruba ta brinda e mentornan tres dia di educacion.  

E aña aki no tabata otro. Diasabra 18 di juni Fundacion Telefon pa Hubentud Aruba a organisa ‘Deskundigheidsbevordering Dag 2022, Tools voor de Mentor’ pa e mentornan. Durante  ‘Deskundigheidsbevordering Dag 2022, Tools voor de Mentor’ e mentornan a ricibi diferente informacion, conocemento y preparacion. 

Primeramente a trata e modelo di combersacion implementa na Telefon pa Hubentud pa hiba un combersacion cu un mucha of hoben. Tambe a para keto na algun instumento di ‘Signs of safety’ implementa den e modelo di combersacion uza na Fundacion Telefon pa Hubentud Aruba. E mentornan a ricibi informacion tambe tocante diferente tecnicaa di scucha y hiba un combersacion. 

Pa por duna sosten, ayudo y informacion na nos mucha- y hobennan ta importante pa e mentor tin mas conocemento di e mente di un persona y e motibo di un conducta. Eddy Oduber di Aruba Hypnosis Center a trata e mente consciente y e mente subconsciente. Aki e mentor a ricibi conocemento tocante e diferencia entre nan dos, cua di nan ta zorg pa cierto conducta y kico ta frena un persona di implementa cierto conducta. 

Raquel Lampe a presenta expresa cu movecion. Durante expresa, cu movecion a ilustra por medio di arte na e mentor con comunicacion na pia di trabao ta importante, y si no tin comunicacion lo tin caos.  

Desde maart ultimo e mucha- y hobennan di e isla di St. Eustatius ta yama 918 na St. Eustatius y ta ricibi sosten, ayudo y informacion for di e mentornan di Telefon pa Hubentud Aruba. Cuminsando for di juli venidero e muchanan di e isla di Saba tambe lo ta yamando na e number 918 na Saba y nan lo ricibi ayudo y informacion for di e mentornan di Telefon pa Hubentud Aruba. Den cuadro di esaki e mentornan a prepara cu informacion etnico, cultura y di educacion di e muchanan di St. Eustatius y Saba. 

E Mentor di Fundacion Telefon pa Hubentud Aruba a ricibi informacion y instrumentonan pa traha cu ne, tocante e disciplinanan ya caba menciona pa asina nan por ta miho prepara na momento cu e mucha y hoben tuma contacto cu Telefon pa Hubentud. 

‘Deskundigheidsbevordering Dag’ ta un di tres training grandi cu Fundacion Telefon pa Hubentud Aruba ta organisa pa train su mentornan tur aña y e aña aki tabata e di 23 biaha cu a organisa esaki.

Fundacion Telefon pa Hubentud Aruba kier a gradici Eddy Oduber di Aruba Hypnosis Center y Raquel Lampe pa e cooperacion brinda.  

Pa mas informacion tocante tur e trabaonan cu Fundacion Telefon pa Hubentud Aruba ta desplega por tuma contacto cu Fundacion Telefon pa Hubentud Aruba via nos facebook: https://www.facebook.com/telefon.hubentud/, email: [email protected] of telefon 5886138/ 5884011.  





Source link

More in Aruba

To Top