Taxista na Minister Ursell Arends: “Minister kier ta ‘wrong and strong!'”

Durante un conferencia di prensa, Minister Ursell Arends, encarga cu e cartera di Transporte a indica cu e Ministeriële Beschikking riba e traspaso di vergunning ta cla y cu e lo firm’e awe, diahuebs.

E minister a indica cu e tin e ‘good to go’ di abogado di e asociacion di taxista, mr. Doris Canwood pa cu esaki. Riba e ponencia aki, nos colega Marko Espinoza den un entrevista cu Linda Orman, di e taxistanan, ta para ariba nan punto cu nan no ta bay acept’e. E ta haya cu e minister ta intransigente, e no ta dialogo y no a laga haci niun sorto di estudio, pa cual e no tin ‘draagvlak’ p’e.

Segun Orman, e MB cu e minister kier bin cu ne, ta contra ley. Su pregunta ta: Con Parlamento, Ministerraad y Gobernador di Aruba, por laga un minister “burla” di e legislacion pa haci loke e kier haci. Esey ta un dictadura! E mandatario ta actuando contra di ley. E taxistanan ta bisa cu e situacion aki no por sigui. Cada biaha ta bin uno cu kier play mas sabi cu nan cu tin e vergunningnan. Pa nan, e vergunning ta di nan,  e ta riba nan nomber y laga nan traha!

E taxistanan ta exigi pa Presidente di Parlamento, mr. Edgard Vrolijk pa yama un reunion publico, nan kier ta eyden pa tur hende den Parlamento wak nan y pa nan durf di bisa nan cu loke e minister ta haciendo, ta lo corecto.

Por ultimo, Orman a  bisa cu nan ta bezig c’un accion di recoleccion di firma, di cual nan tin mas di 300 firma caba. Tambe el a bisa cu e asociacion cu e minister a sinta cu ne, ta esun di mas chikito y cu nan ta e mayoria. Kico mas e mandatario kier bin cu ne?

DEMAS STAKEHOLDER

Ronny Gomes, taxista, tambe ta exigi pa e minister revoca e MB aki. El a indica cu el a reuni cu otro stakeholdernan, ya cu no ta pa taxista so. Si ta papia di transparencia, bin c’un reunion publico pa tur hende sa kico ta pasando.

Tin otro stakeholdernan cu ta uni nan mes na e lucha di e taxistanan. Parlamento tin e poder pa yama un reunion publico pa tur hende haya sa kico ta pasando. E mandatario kier trece desunion entre e taxistanan. Ora cu e mandatario kita e MB, e ora nan ta bay dialoga y no prome! Minister kier ta wrong & strong!

Tin mas stakeholder cu tambe ta uni nan mes n’e causa, pero Gomez a bisa cu e no ta bay divulga ken nan ta. Nan no ta bringando pa nan so, pero pa un y tur. “Por spera un accion un momento pa otro”, Gomes a bisa. 

PRESIDENTE DI PARLAMENTO

Manera ta conoci caba, e taxistanan ta exigi p’e Presidente di Parlamento, mr. Edgard Vrolijk manda yama e reunion pa awe ainda. Sinembargo, Vrolijk a duna di conoce cu, debi na compromisonan familiar, e lo no por manda yama e reunion awe mas, manera cu e taxistanan tabata pidi.