Connect with us

Ta un berguensa cu Parlamento no por a uni pa Ombudsman

Caribe

Ta un berguensa cu Parlamento no por a uni pa Ombudsman


Den un conferencia di prensa diaranson mainta, ex-minister y lider di Plataforma Nos pais, Otmar Oduber, a expresa su desapunto y preocupacion profundo tocante e recien proceso di nombramento di Aruba su prome Ombudsman. E proceso, cu mester tabata uno transparente, imparcial y profesional, a converti den un berguensa nacional, segun Oduber.

“E tabata un berguensa grandi pa mira un Parlamento di Aruba cu no por a uni su mes ni pa scoge un defensor di pueblo,” Oduber a declara. E proceso tabata mancha pa leakmento di informacion for di Parlamento, exponiendo nomber di e candidatonan profesional y causando cu un di nan a retira su candidatura.

Oduber a cuestiona e falta di madurez, profesionalismo y integridad di e Parlamentarionan, kendenan a permiti wega politico kibra e proceso. “Nan no por a actua na un forma madura, profesional y definitivamente no cu integridad,” el a enfatisa.

E ex-minister a subraya e importancia di e Ombudsman como un defensor imparcial di tanto e pueblo como gobierno. E proceso mester tabata uno bunita, caminda cu e Parlamento a haya conseho di e colegio mas halto di Aruba pa nombra un persona imparcial. En cambio, e proceso a bira uno di division y falta di respet pa e profesionalnan cu a postula.

A pesar di e obstaculonan, finalmente a scoge abogado Jurima Bryson como e prome Ombudsman di Aruba. Oduber a felicita Bryson pa su nombramento, pero a cuestiona e capacidad di Parlamento pa actua na interes di e pueblo. “Tur parlamentario ta sali pafo, tur parlamentario ta critica e proceso, tanto esunnan den gobierno como den oposicion. Pero ta boso, shonnan, tabata e protagonistanan di e desaster aki cu a tuma luga den parlamento,” el a conclui.

E palabranan fuerte di Oduber ta refleha un preocupacion creciente den comunidad tocante e funcionamento di Parlamento y e necesidad pa mas transparencia y integridad den e proceso di tumamento di decision. E caso di e Ombudsman ta sirbi como un recordatorio cu e institucionnan di gobierno mester sirbi e pueblo prome cu tur cos, y cu e weganan politico mester ta poni un banda pa e bienestar di e comunidad.





Source link

More in Caribe

A2Z ADMINISTRATION

AD

To Top