Connect with us

Ta organisa tayer riba presente y futuro di region Caribe

Aruba

Ta organisa tayer riba presente y futuro di region Caribe


Diamars dia 29 di november te diahuebs dia prome di december lo tuma luga un tayer internacional cu e expertonan di Caribe na Museo Arquelogico Nacional Aruba (MANA). E tayer tin como tema: Solucionnan di conocemento tradicional pa resiliencia y adaptacion na cambio di clima den presente y futuro di Caribe.

E evento, na cua publico por asisti ta diahuebs, esta prome di december, di 6:30 pm pa 8:30 pm, ta parti di e proyecto multidisciplinario y internacional ‘Islanders at the Helm’, bou presidencia di dr. Francio Guadeloupe y Prof. dr. Corinne L. Hofman di e universidadnan di Amsterdam, Leiden y KITLV.

E anochi aki e representantenan dje comunidad- Indigena di Caribe y agricultornan lo papia riba uzo di conocemento tradicional pa fortifica capacidad pa adapta na cambio di clima. Idioma di panelistanan ta Ingles.

Arkeologo Harold Kelly di Aruba y arkeologo Caribense Andrea Richards, e candidatonan PhD den e proyecto “Islanders at the Helm’ y prof. Corinne Hofman ta e organisadonan di e tayer internacional indica na cua experto- y profesionalnan internacional y local ta invita. E tayer aki a ser haci posibel cu financiamento di e programa Islanders at the Helm, KITLV, CaribTrails, UNESCO-Caribe y Pais Aruba/Ministerio di Finansa y Cultura. MANA ta expresa su gratitud na tur instancia y persona local como internacional cu a contribui pa realisa e tayer menciona.

Intencion ta pa comparti via ‘Livestreaming’ e presentacionnan riba 29 di november 2022 cu ta programa di 9:30 am pa 5:30 pm. Tambe ta trata pa comparti den dia via Livestream riba diahuebs prome di december e resultadonan di e deliberacionnan den e gruponan. Ta pidi pa keda pendiente di e anuncio riba e paginanan di Facebook National Archaeological Museum Aruba y Museo Arqueologico Nacional Aruba, y di ‘Islanders at the Helm.’ Si ta desea mas informacion por tuma contacto cu MANA via telefon 582-8979 of via [email protected].





Source link

More in Aruba

To Top