Connect with us

Stichting Ambiente Feliz a ricibi un Chevrolet Groove nobo for di Astec

Caribe

Stichting Ambiente Feliz a ricibi un Chevrolet Groove nobo for di Astec


Groepsfoto

Diabierna, 7 di juli, Stichting Ambiente Feliz a ricibi un Chevrolet Groove nobo como donacion di Aruba Stevedoring Company (ASTEC) N.V. E compania Astec tin hopi aña ta aportando grandemente na e rifa di Rotary Club durante nan Fiesta Rotaria cu e intencion pa asina duna bek na comunidad.

Nan tambe sa yuda fundacion directo cu diferente proyecto. E aña aki Astec, representa pa nan Managing Director Christopher Lake, a bay cu e prome premio di e rifa cu tawata un Chevrolet Groove. Astec na su turno a dicidi di yuda un fundacion den e vecindario di Santa Cruz cu por haci bon uzo di e SUV.  Asina a yega na Stichting Ambiente Feliz cu tin gran necesidad pa transport nobo.

Groepsfoto

E fundacion mes ta percura pa transporte pa nan clientenan cu durante siman ta bishita entre otro pasa dia y den fin di siman ta bishita famia of ta haci otro tipo di actividad.

Stichting Ambiente Feliz, un fundacion funda na october 1986 cu ta consisti di 2 localidad, ta brinda servicio residencial na persona cu limitacion intelectual of multiple. E fundacion cu ta brinda su servicio actualmente na 26 cliente a keda masha contento cu e bunita gesto di Astec y a ricibi e donacion cu man habri. Como fundacion cu ta wordo subsidia door di Land Aruba e ta depende hopi ariba donacion pa por inverti den su facilidadnan, transport, material pa traha cu ne, desaroyo profesional di su empleadonan y mucho mas.

Rotary Club cu pa añanan largo ta trahando duro pa por yuda esnan mas vulnerabel den comunidad semper a aporta na e fundacion. E hecho cu e prome premio di nan rifa a yega na nos fundacion pa asina por sirbi nos clientenan ta algo extra special. E siguiente meta ta pa yega na un rolstoelbus pa e localidad Cas Briyante na unda varios cliente ta haci uzo di rolstoel. Pa por logra e meta aki e fundacion ta keda conta entre otro ariba e sosten di e comunidad y lo sigui organisa varios evento pa por recauda fondo. 





Source link

More in Caribe

A2Z ADMINISTRATION

AD

To Top