Connect with us

Sospechoso Antoni Gario a pone fin na su bida den cel

Aruba

Sospechoso Antoni Gario a pone fin na su bida den cel


Despues cu a detene Antoni Gario di 52 aña di edad diabierna pa sospecho di abusa di su propio yiu, awe riba Dia di Tata, trahadonan di Cuerpo Especial Arubano (CEA) a topa cu ne den cel, sin cu e tabata duna señal di bida. Pa 1:05pm Dr. Texier ta constata su morto.

Segun a compronde, e no tabata reacciona y a purba reanim’e. Ambulance a presenta na sitio pa brinda asistencia medico riba e detenido, pero mucho mas nan no por a haci cu ne. Vocero di polis a confirma e morto di Antoni Gario.

A detene Gario diabierna mainta na su cas pa un investigacion cu a inicia na aña 2019 caba, ora su yiu muhe, e tempo ey ainda bou 16 aña di edad, a entrega un keho penal contra dje. For di e keho cu e yiu muhe mes a entrega contra su tata, mester a haci un investigacion riguroso y extenso.

Prome bes cu a detene Gario tabata dia 13 di juli 2019. Dos dia mas laat, hues-comisario a prolonga e detencion cu ocho dia y dia 18 di juli 2019 el a recobra su libertad.

Sinembargo, ora a detene diabierna ultimo, e interogacion di Antoni Gario a bay largo. Te despues di 9:00 pm a sali cu ne for di warda di polis na Playa, caminda e recherchenan di JZP a interog’e, pa djey transport’e pa warda di polis na Shaba. Na su salida el a declara cu: “Totalmente inocente boys.”

Antoni Gario a horca curpa den cel. https://24ora.news/3N4uhJu

Posted by 24ora on Sunday, June 19, 2022

Antoni Gario ta un musico prominente di nos isla cu ta bin for di San Nicolas. E ta lider di e banda musical Le Groove y ta dirigi tambe un grupo di Carnaval yama Pink 4 Life. Un di su ultimo triunfonan tabata como Soca Monarch na februari 2020. De facto, e ta e ultimo Rey di Soca di nos isla, pasobra despues di esey no tabatin festival di calypso y soca mas debi na pandemia.

Investigacion

Awe merdia Ministerio Publico a anuncia cu e investigacion specifico aki ta den man di Landsrecherche. Manera ta conoci, na momento cu mester husga trabou di polis of di cualkier empleado publico, cu ta laga Landsrecherche conduci e investigacion penal. E motibo ta pa evita cu por crea e impresion cu polis no por investiga polis. Landsrecherche, aunke nan tin e mesun poder cu polis, nan ta resorta directamente bou di Procurador General y no bou di altocomisario di Cuerpo Policial Aruba. Den e caso aki, lo mester investiga si e Chef van Dienst na ward’i polis di Noord a actua corecto y si e personal di Cuerpo Especial Arubano (CEA) a haci su trabou como debe ser. Pasobra si ta controla segun e oranan stipula y ta tira bista constantemente riba preso, no ta supose cu nan por haya chens y material pa comete suicidio. Den caso cu un di e dosnan aki no tabata atento, lo por spera medida disciplinario of kisas hasta penal. Pero pa awo ta mucho trempan pa specula riba kico por a bay robes den e caso aki.

Headlines Group, cas editorial di 24ora.com y Trempan, ta expresa palabra di condolencia na su señora/pareha, su yiunan, famia y tur conocinan, den e momento dificil y di tristesa aki. Cu Gario sosega na paz.





Source link

More in Aruba

To Top