Connect with us

Sociedad Interamericana de Prensa a pidi gobierno di Aruba pa desmantela e cultura di silencio

Aruba

Sociedad Interamericana de Prensa a pidi gobierno di Aruba pa desmantela e cultura di silencio


Ayera Sociedad Interamericana de Prensa (SIP) a pidi gobiernonan di diesdos pais Americano, di cual Merca tambe ta un di nan, pa stop di restringi e derechonan constitucional y e leynan di acceso na informacion publico. Den un resolucion aproba durante di e reunion di e organisacion di medio di comunicacion cu su sede na Miami, a pidi tambe n’e gobiernonan di e continente pa nan “stop di obstaculisa y restringi e trabao di prensa” y “desmantela e cultura di secreto.”

Entre e “considerandos” di e resolucion ta afirma cu “e restriccionnan n’e acceso na informacion ta un di e limitacionnan principal na libertad di expresion y n’e derecho di publico na informacion.”

Segun SIP, e paisnan unda cu e periodista- y e medionan di comunicacion ta sufri di e restriccionnan aki ta Aruba, Bolivia, Canada, Costa Rica, Cuba, Merca, Guatemala, Paraguay, Peru, Puerto Rico, Republica Dominicana y Venezuela.

E resolucion ta expone n’e situacion rib’e materia aki cu algun di e paisnan aki y ta destaca den e contraposicion na Honduras di e Ley di Secreto di 2014 caminda cu ta haci vulnerabel e derecho di acceso na informacion publico y e principio di transparencia. Cu relacion na Colombia, SIP ta subraya cu e obhecion di e presidente Ivan Duque, n’e proyecto di ley 473 pa para e ampliacion di e terminonan di atencion di peticion na autoridad, estableci durante e pandemia, ta mira como un violacion n’e acceso oportuno na informacion publico.

Na Merca e acceso na registro publico ta sigui ta un preocupacion na nivel estatal y federal, SIP ta agrega. Na Paraguay varios institucion estatal ta nenga di cumpli cu ley di acceso na informacion publico y na Puerto Rico, corte ta sigui ta e miho herment pa pone e leynan di transparencia bal y brinda acceso na informacion ora cu for di e poder Ehecutivo y Legislativo ta pone obstaculo. E resolucion ta mustra tambe cu na Republica Dominicana a registra keho di varios medio di comunicacion pa resistencia di parti di funcionario of institucion publico na divulga informacion di interes ciudadano.

SIP ta agrega cu na Venezuela ta blokia e acceso na medio digital, plataforma di multimedia, streaming y red social, accion ehecuta p’e empresanan di telecomunicacion oficial y priva, cu e intencion di silencia periodismo independendiente.

Aki na Aruba, ministernan di Gabinete Wever-Croes a sali publicamente bisando cu nan no ta contesta preguntanan di prensa, entre otro di 24ora.com. No ta manda comunicadonan di prensa, ni invitacion, ni tampoco ta contesta pregunta durante conferencianan di prensa den sala di prensa di gobierno. Prome Minister a bay mas leu di bisa den pleno reunion di parlamento cu el a pidi su parlamentarionan pa no traha cu 24ora.com. E mesun partido politico na mando, den pasado, a saca sticker bisando “Mi NO ta kere Diario”. Awor hunto cu nan partner den coalicion, Raiz, ta purbando pa introduci un Media Raad, cu e meta pa silencia prensa of obstaculisa nan trabou.

E situacion reinante a pone cu colega Andreina Figaroa-Morillo a manda un carta, a titulo personal y como miembro di SIP, na Gobernador di Aruba pa expresa su preocupacion. Gobernador a manda e carta na minister-president pa e haci trabou di e keho. E ultimo a manda yama e periodista pa un audiencia, pero sin cu a sali ningun cambio di actitud of maneho contra prensa local. Tanten cu no bin cambio, SIP lo mantene Aruba entre e paisnan cu ta stroba libertad di prensa.

E organisacion “Inter American Press Association” of na Spaño yama “Sociedad Inter Americana de Prensa” ta existi desde aña 1943 y ta representa mayoria medionan di comunicacion den Norte America, Sur America y Caribe, cu mas di 1300 miembro y cu su base situa na Miami. Headines Group, cas editorial di e portal di noticia 24ora.com y TREMPAN ta un miembro activo di e organisacion internacional aki.





Source link

More in Aruba

To Top