Siman di conscientisacion p’e cuido di oido a culmina cu exito

Quota Club of Aruba a clausura cu exito su siman di conscientisacion riba cuido di oido, destacando e participacion comunitario y e sosten di e cuater centronan di prueba. E evento aki tabatin como obhetivo promove e importancia di e salud auditivo y brinda acceso gratis pa examen di oido.

Juliska Harms, presidente di Quota Club of Aruba p’e periodo 2024/25, a expresa su satisfaccion p’e exito di e siman di conscientisacion. El a gradici e cuater testcenternan cu a sostene e iniciativa y tambe n’e miembronan di e club cu a traha como boluntario, dedicando su tempo pa ricibi e personanan cu a acudi  pa realisa nan test auditivo. Harms a destaca e importancia di e participacion di e comunidad p’e logro di e obhetivonan aki.

Stella Montsanto, director di servicio di e club, a comenta cu e club tabata completamente enfoca riba e conscientisacion durante henter e luna di september, culminado cu un resumen positivo di parti di e testcenternan riba e desaroyo di e actividadnan. Lo presenta e datonan recolecta despues pa informa e comunidad riba e resultadonan di e siman. Fuera di esey, a entrega reconocemento den cuadro cu e Dia Internacional di Persona cu Discapacidad Auditivo, tumando luga diasabra. Raybert Ramada ta un hoben cu a converti den un ehempel di perservarancia p’e comunidad. E tambe a ricibi su reconocemento. Tambe Quota Club a reconoce su dunado di trabao, pa su compromiso cu e inclusion di persona cu deficiencia auditivo.

Montsanto a resalta e importancia di continua check e salud di oido, no solamente durante evento manera esaki, sino di manera regular pa detecta problema na tempo. Montsanto a gradici e miembronan di e club pa nan sosten, cu a contribui n’e exito di e siman di conscientisacion.