Shailiny Tromp-Lee (MEP): Como sociedad mester kibra e silencio tocante salud mental

Despues cu Gobierno a uni tur actor trahando pa salud mental a percura pa e inversionnan necesario den nos profesional y instancianan. Den diferente reunion den Parlamento Minister Rocco Tjon, encarga cu Husticia y Asuntonan Social, a indica cu desde cu el a asumi responsabilidad, el a experiencia e necesidad pa uni tur actor cu ta traha cu salud mental bou di e capa di su ministerio.

Esaki mirando e complehidad cu maneho di salud mental ta trece cu ne, y tambe cu salud mental mas y mas ta wordo relaciona cu ambos di su carteranan. Na december 2021 a oficialisa e union cu firmamento di e samenwerkingsprotocol GGZ Aruba door di FADA, HAVA, Stichting Hunto, Respaldo y Ministerio di Husticia y Asuntonan Social. Trahando cu un structura nacional caminda tur partners ta traha hunto nos por duna contenido na prevencion, cuido (basico y specialisa) y “nazorg” eficiente y efectivamente. Esaki sigur mirando e scarsedad di fondo y profesionalnan.

Tres aña pasa, simultaneamente cu e proceso akiriba menciona, cu asistencia di PAHO (Pan American Health Organization) a diseña un roadmap pa Aruba, di con tin cu bay atende cu salud mental. E roadmap ta stipula un ruta di 10 aña, esta di 2021 te cu 2031. Pa realisacion di e roadmap aki Minister Tjon a institui un “steering committee” (stuurgroep) cu ta consisti di tur stakeholders di e veld, pa di e forma ey por traha riba diferente tereno manera legislacion, financiamento, structura, desaroyo profesional di tur e profesionalnan cu ta traha den e veld, pero tambe sigur mes importante e parti di prevencion. 

Recientemente a keda presenta un investigacion a wordo conduci cu yama “STEPS”. E investigacion aki a tene cuenta cu aspectonan di salud mental, y a base di e resultadonan di e investigacion a traha un plan di accion di con Aruba lo bay atende cu e diferente reto y metanan cu a wordo treci padilanti. Alabes a base di e resultadonan aki, conhuntamente cu PAHO lo bay evalua e roadmap y percura pa e adaptacion/cambionan si esaki ta necesario.

Como sociedad nos mester ta consciente cu nos mester concentra hopi riba prevencion. Ta sumamente importante pa kibra e silencio y e taboo pa loke ta trata salud mental. Crea e condicionnan caminda esnan cu mester di ayudo ta sinti nan mes comodo pa haci esaki. Mester kita e stigma di berguensa. Retonan social pa cu salud mental ta algo mundial, y como pais nos tambe mester percura pa kibra e stigma, pa asina salud mental por bira un topico normal den nos sociedad. 

Hopi ta e esfuerso realisa y inversionnan aloca den entre otro opleiding, curso, materialnan necesario como tambe e parti infrastructural. Lastimamente e fruto di e inversionnan nos no por mira mesun liher cu nos ta desea pero ta trabounan grandi a tuma y ta tumando lugar. Pa menciona algun: a y ta sigui amplia e servicio pa cu salud mental y haci’e mas accesibel, inicio di e opleiding “Praktijkondersteuner Huisartsen Geestelijke Gezondheidszorg”, a amplia e cuido cu introduccion di fact teams y crisidienst (cu ta consisti di profesionalnan cu ta 24 ora pa dia disponibel pa atende cu incidentenan), a realisa diferente inversion den prevencion, inversion den optimalisacion y pa sigui hisa e nivel di capacitacion di e personal den e sector aki, a certifica profesionalnan den multidimensioneel familie therapie, a inicicia e proceso di adaptacion di e “krankzinnig verordening”, a organisa mental health conference, ta trahando duro y riba nivel nacional pa bin cu un enfoke mas compasivo, inclusivo y efectivo pa cu cuido di salud mental, a inverti den infrastructura (a construi edificio nobo pa Stichting Hunton a Dakota, Renovacion di Centro Colorado etc) cu a haci integracion fisico di locual ta psikiatria y tratamento di adiccion bou di un solo dak y asina nos por sigui menciona.

Meta di tur e proyecto y inversionnan aki ta pa logra cu cuido di salud mental ta bira mas accesibel, inclusivo y efectivo pa un y tur. Mi ta uni mi mes na e yamada di Minister Tjon pa accion, pa cada un di nos yuda cu e parti di concientisacion di salud mental, pa nos sostene esnan rond di nos den nan momento di necesidad y pa contribui na un comunidad caminda ningun hende ta keda atras pa motibo di problemanan di salud mental of di adiccion. Door di esfuersonan colectivo e vision aki lo por wordo completamente realisa na bienestar di esnan cu ta enfrentando desafionan di salud mental y adiccion.