Sexting: Sospechoso tabata check ken tin placa y ken ta bashi

E sospechoso Ana Tse-Mora, naci na Republica Dominicana y trahando na un banco local, no a logra termina su trabou diabierna pasobra dos recherche a bin busc’e na trabou y a bay cu ne. Awe e no por a traha pasobra e ta encarcela na ward’i polis, pendiente pa e duna cuenta di e sospecho cu tin riba su posibel rol den e scandal sexual grandi aki cu a laga hopi hende plan bari!

Ya caba tin cinco detencion, di cual ta tres hende muhe y dos hende homber. Mas den dia a informa di e hende homber pero awo a haya identidad di por lo menos un di e hende muhenan envolvi, esun cu ta traha na banco y cu nan ta sospech’e di tabata loer ken tin moda y ken no tin mod’i paga ora di extorsion. Asina e organisacion criminal a infiltra tur caminda den comunidad, hayando acceso na informacion cu otronan no por yega na dje.

No ta conoci si tabatin mas detencion awe, pero merdia den Enfoke, Lito Lacle (Vocero di Polis) nona descarta cu mas detencion lo cay den e caso aki. Ta papia di un organisacion criminal poderoso, di cual a haya mas o menos 100 mil florin cash na cas di un di e sospechosonan.

Mester menciona cu polis a pidi pa tur e victimanan bin padilanti y haci denuncia na polis. No mester tene berguensa pasobra ta importante pa persigui e grupo aki pa stop e extorsion, e menasanan y purba saca placa di tur cu a cay den nan trampa. Tur tip, tanto oficial of via di e tipline 11141, ta yuda pa yega na tur e sospechosonan y hiba nan dilanti mesa berde pa un hues husga tur!