Connect with us

SEPPA: Gobierno a kita placa di mas for di ambtenaarnan

Aruba

SEPPA: Gobierno a kita placa di mas for di ambtenaarnan


Tur cos ta mustra awor cu entre Departamento di Recurso Humano (DRH), Directie Financien y Departamento di Impuesto (DIMP) a comete un eror grandi cu retencion di salario di empleado publico. Ta parce cu un di nan a formula e retencion robes y cu awor ta parce cu probablemente a retene cen di mas di empleadonan publico. Tur a sinti cu a kita demasiado di nan, por lo menos mas di locual tabata kita prome cu pandemia. Sindicato di Empleadonan Publico y Priva di Aruba (SEPPA) a adverti adelanta, cu a purba haci cos den pura sin calcula na drechi y esaki awo ta e resultado.

SEPPA ta lamenta cu ta haci fout cu placa di hende y Gobierno ni ta sali pa pidi despensa y splica con nan lo coregi nan mesun eror. Awo e tres departamentonan ta puntando dede riba otro, pero esun cu a sali victima ta e trahadonan cu a cobra di menos. Esun ta wak e otro pero sin cu ainda por saca afo ken a conta robes y tampoco si lo duna cen bek e luna aki mes ainda of lo coregi den e siguiente payroll.

E discusion ta cu na aña 2020 a retene salario pa paga henter e suma na augustus y november. Sinembargo a paga mita so! Kico a pasa e ora cu locual a retene anto? Henter e formula no ta cuadra y consecuentemente a djis retene pa retene cu tur inconveniencia cu esaki a trece pa e clase trahado. Top ambtenaarnan a ripara den nan caso cu a bay atras cu como 600 florin pa luna, cu no ta husto!

Pues, pa splica mas facil: Na aña 2020, ora a paga e vakantie uitkering na 50%.. e ora si gobierno no a worry cu e belasting cu e ambtenaar y otronan a paga caba desde juni 2019 te cu mei 2020! A spaar pa paga 100% pero a paga 50% y sin duna e ambtenaar nan placa bek! Pero ora di kita si gobierno kier yega kita sin calcula na drechi.

SEPPA lo sigui e desaroyo aki di cerca pa sigura cu Directie Financien lo coregi e eror cometi den payroll, debolbe loke a kita di mas y pa coregi e formula pa e lunanan nos dilanti. Sindicato SEPPA ta adverti cu mester ta hopi mas cauteloso cu placa di hende y pa ta sigur ora mishi cu salario di otro. Tur ambtenaar tin nan gastonan fiho y door di retene placa asina sin mas, sin avisa adelanta, solamente ta hinca e clase trahado den problema financiero.

SEPPA ta adverti Gabinete Wever-Croes II cu ya caba tur cos a subi ma Aruba, e poder di compra a bay hopi atras, e salarionan no ta alcansa mas y awo cu a aumenta BBO a haci tur cos ainda mas caro pa tur hende. Pues en bes di papia di indexering y inhaal manouvre di tur loke e empleado publico a entrega, awo ta bin retene mas salario.

Tambe a trata e empleado publico hopi diferente compara cu esunnan trahando den companianan estatal. Aunke ambos ta traha directamente pa gobierno, a corta den salario y beneficio di esun, mientras e otro a sigui cobra normal, a cobra bonus y e aña aki a hasta haya aumento! Mientras cu ambtenaarnan tin cu atene nan mes na Croes-Wever norm, tin compania estatal cu simplemente no ta atene nan mes na e regla aki y a sigui paga salarionan halto normal.

Ta bon pa accentua tambe cu e maneho di Gabinete Wever-Croes den companianan estatal tambe ta diferencia hopi for di otro! Asina a nota cu ora di corta den entrada, a yega lihe na Arubus, Post Aruba, Aruba Ports Authority, etc. Den caso di e dos prome dos compania, a suta e trahadonan cu medida di prome dia te final. A corta nan salario, kita beneficio, tin di nan ni fiesta di Pasco no tabatin. Pero, otronan a haya fiesta ma grandi den hotel, cobra bonus y haya adelanto. Pues ta depende pa cua compania estatal bo ta traha, e trato tabata totalmente diferente y hasta discriminatorio! SEPPA no ta contra e desaroyo aki di aumento di salario y beneficio pa trahadonan di gobierno den compania estatal, al contrario, ta apoya cu e clase trahado ta sigui progresa. Pero si mester reparti e progreso entre tur, pues pa ambtenaar y trahado den compania priva di gobierno. No por aplica “hancho pa esun y smal pa e otro”.





Source link

More in Aruba

To Top