Connect with us

SEPPA: Derecho di trahado ta keda vigente

Aruba

SEPPA: Derecho di trahado ta keda vigente

Riba prome di mei nos ta recorda luchadonan grandi di 135 aña.  Kende a hiba un lucha unda sanger y morto a cay pa un dia di trabao di 8 ora.  Un 8 ora di trabao cu e pandemia na 2020 a kibra den otro y cu awe na 2021 ta hopi trahado eyfo kier recupera bek pa sikiera bolbe un poco na loke nan tabatin como entrada. Si 1 aña pasa nos tabata preocupa cu e situacion aki di disaster cu tur su consecuencianan cu e a trece cu ne, awe 1 aña despues nos ta mas preocupa ainda.              

Nos a bin ta mira con trahado den tur sector ta perdiendo parti di nan salario, parti di condicionnan secundario y den algun caso hasta trabao.  Igualmente nos mester recorda e cantidad di trahadonan rond mundo cu ta muriendo pa falta di siguridad na luga di trabao. Tambe e grupo di trahadonan cu ta pasando bao stress y cansancio cu ta haci su efecto riba e salud psychological di trahadonan cu den mayoria caso ya caba ta laborando cu sobrepeso di trabao y sin papia mes di e salarionan abao.   Un situacion hopi dificil unda hopi di esunnan cu a pasa den e situacion aki nunca por a imagina nan mes cu esaki lo yega cerca nan.  

E pandemia a expone con debil nos economia ta y na mesun momento a haci nos limitacionnan mas grandi.  Netamente e trahadonan den trabaonan vulnerabel y esunnan cu tin salarionan mas abao a haya e golpi mas duro.

Asina mes nos mester tuma e reto pa no solamente recupera trabaonan perdi pero evita tambe cu trahadornan ta keda pega permanentemente den condicionnan di trabao precario. Pues, ta nos mester pone como meta nos dilanti pa nos construi miho cuponan di trabao y tambe pa  nos cuminsa pone como meta nos dilanti con nos ta bay soluciona tur e problemanan  cu nos  tin nos dilanti y traha pa e trahado ey cu a perde parti di su entrada recupera esaki tambe.    Sea ta esun den sector publico como pa esun den sector priva. Pero sin lubida esun cu a perde trabao, con nos ta bay pusha pa nan tambe por haya un trabao bek. Ningun hende a pidi pa ta den e situacion aki di disaster y ta hopi necesario pa entre dunado di trabao y trahado por yega na un balans den cada paso cu mester tuma pa salba  mas tanto cu por e cuponan di trabao.  No ta solamente e trahado ey tin e necesidad pa su tiki entrada sino ta henter un famia cu ta depende di esaki tambe. 

Gobierno como dunado di trabao a dicidi di no ta reuni cu SEPPA, SADA, SIMAR y SPA.

Den e ultimo siman a surgi un deadlock cu gobierno den su rol como dunado di trabao. Esaki pa motibo cu segun nos prome minister, sindicatonan lo a crea un percepcion eyfo of den prensa cu tin conflicto entre gobierno y sindicatonan.   Esaki despues cu sindicatonan den conferencia di prensa a sinti pa duna of corigi informacion na pueblo y na miembronan.  Ta parce cu awo e percepcion cu un dunado di trabao tin of laga di tin ta defini  si discusionnan ta tuma luga, ta sigui si of no.   Ta tristo cu si ta asina ta bira e forma nobo pa atende asunto cu trahado. Si situacion di trahado tabata bon, no tabatin necesidad di sindicato. Y esaki dunado di trabao awe na 2021 no ta caba di compronde.

Si un tempo nos tabata papia di reunion den e comision di GOA di acuerdo cu LMA, despues a bira acuerdonan basa riba reunionnan bilateral,  awe na 2021 ta reuni cu esun cu no ta keha, no ta critica.  Di e forma aki ta falta respet pa e afiliacion liber di trahado na e sindicato cu e ta scoge. Otro muestra mas di decadencia na Aruba. 

Mientras cu kier yena trahado cu aplauso e trahado ta haya sota

Cu 1 di mei, dia di trahado nos dilanti nos no por perde for di bista cu tin un Landspakket  den cual tin tur intencion di acomoda nos Leynan Laboral.  Pa esaki tin forsa nan grandi contra e clase trahado cu ta busca tur forma pa elimina e poco leynan cu ta proteha e trahado. P.e.  Ley di retiro,  contract di corto duracion, tur loke cu por ta stroba dunadonan di trabao pa haci y deshaci cu e trahado. Tur esaki cu e pretexto di Covid.

Ta ora pa movemento di trahado prepara su mes pa defende derecho di trahado.   Ta momento pa nos pone bon cla cu simplemente  bolbe construi  riba un sistema bieu no ta bay funciona.  Esunnan cu a masacra e trahado, core tira nan responsabilidad riba gobierno, keda sin cumpli of paga trahado y core exigi di gobierno pa pueblo bin carga e peso, no por bin pretende cu nan ta bin trece e solucion. Nan a pone ‘Ganashi na prome lugar cu e Hende’.   Awo mas cu nunca nos mester tin cambionan cu ta saca e trahado di e masacre aki.

E atake riba  politicanan  social ta fuerte.  Ta tarea di nos pa lucha pa un politica social na Aruba y banda di dje nos mester por defende e derechonan adkiri di trahadornan na Aruba.    Esaki ta nifica mantene e pakete di condicionnan secundario di e ambtenaar, di e trahado di fundacion, di e trahado di empresanan estatal y unda cu por nos ta amplia e pakete.                  
E pakete di condicionnan secundario y salarionan den sector publico mester ta nos guia pa defende e trahado di sector priva.

Nos no por permiti cu ta uza disaster, covid 19 como pretexto pa caba cu derechonan y condicionnan di trahador, bao di e pretexto cu asina so negoshinan por sigui draai of cu ta asina so ta drecha nos economia.

Pa nos construi un pais bek: Dialogo ta urgente !

Nos pais no por sigui sin un dialogo efectivo cu su partnernan social y diferente grupo. Awo mas cu nunca a keda proba cu dialogo ta esencial si nos kier papia di trabao decente cu ta alcansa e deseo di trahadonan na pia di trabao. Na unda oportunidadnan di trabao cu entrada husto ta comun mester keda identifica y diferencianan di opinion reconcilia. Solamente keda discuti, unda ta crea siguridad di trabao y miho carera.   E ta e miho mecanismo na unda interes nan di e forma aki nos por yega na e recuperacion di nos pais y alcansa husticia social y stabilidad economico.

Nos mester sigui papia y lucha pa mas y mas trahadonan organisa nan mes y participa den desicion nan cu ta afecta nan bida. Ta keda na nos pa insisti, exigi y lucha pa e spirito keda. 



Source link

More in Aruba

IMPORTANT ANOUNCEMENT

Advertisement
Advertisement

Trending

Advertisement
Advertisement
To Top