Connect with us

Security Guard di aeropuerto deteni den cas’i droga

Aruba

Security Guard di aeropuerto deteni den cas’i droga


E tin mas di un aut’i careda siendo un security guard di Aruba Airport Authority N.V. Su standard di bida probablemente ta mas halto di locual e tin na salario, pa cual a lanta sospecho cu e lo por ta meti den baho mundo. Diabierna ultimo recherche a yega y deten’e na su cas, situa na Tanki Leendert.

Ultimo simannan polis ta haciendo un investigacion grandi relaciona cu benta di droga na cas. E ekipo di recherche, conoci como “Team Drugspanden” ta bishita varios cas y detene varios sospechoso.

Pero esunnan envolvi a sorprende hopi. Den e caso specifico aki, polis a detene e homber N. Reyes-Monegro, miho conoci como Pester, hunto cu su ruman homber F. Reyes-Monegro. Pa colmo, Pester ta traha como Security Guard na Aruba Airport Authority y e ruman homber ta traha como Security Guard na Cuerpo Especial Arubano.

Na e cas polis a topa cu cultivo di marihuana y a topa mas tipo di droga tambe. Ta cuestiona con dos ruman cu ta traha den siguridad pa sea gobierno of pa un compania priva di gobierno por ta meti activamente asina den un organisacion criminal cu ta cultiva y bende droga. Na e cas a topa cu artefactonan profesional pa produccion di droga.

E echo cu un di e sospechosonan ta traha na aeropuerto, ta haci cu tur wowo awor ta riba posibel link entre su negoshi di droga y su trabou. Cu un miembro di siguridad di aeropuerto ta pertenece na un organisacion criminal ta habri caminda pa sospecha cu lo ta sea exporta of importa droga tambe via avion. Recherche awor ta repasando tur posibel forma di prueba pa revisa su forma di traha.

Mester menciona cu Ministerio Publico hunto cu Cuerpo Policial Aruba a lanta un team special pa ataca benta di droga na cas di hende. Ta compila informacion di cumprado y bendedo pa gara nan hunto. Den e grupo aki tin e organisacionnan criminal tambe cu ta cultiva mata di marihuana of ta produci pakinan di droga pa benta por mayor of por detal, pues pa mercado local.





Source link

More in Aruba

To Top