Connect with us

Sea agradecido na Dios cu ta doño di tur cos

Aruba

Sea agradecido na Dios cu ta doño di tur cos


Ora hende grandi demostra gratitud na Dios, nos muchanan, nos hobennan, nos nietonan, nos futuro generacion lo mira, y nan lo sa cu Dios ta doño di tur cos.

Awendia  hopi hende ta cana rond cu un mente materialista, mecanisa, digitalisa, cu no sa di gradici Dios, pasobra nan no a wordo instrui pa gradici Dios, pero simplemente ta kere den ciencia y technologia, y den e palabra universo, y hopi no sa cu ta Dios tin tur cos den su man, cu nos no ta depende di rikesa, poder of propiedad, mas nos tur ta depende di e misericordia di Dios. Sea un persona ta kere den Dios si of no, e ta depende di Dios pa su bida, e ta depende di Dios pa e rosea cu e ta ricibi, por ta e persona por tin un otro nomber cu e ta husa y den cual e ta kere pero hasta e nomber ey ta depende di Dios. Pesey ta un tristesa y berguensa  ora nos yega un caminda den nos bida, den cual nos kier aplica tur tipo di sabiduria, inventa y instala tur tipo di comision, crea grupo nan di consehero, pero e nomber di Dios no ta wordo menciona.

Wak rond mundo kico ta pasando, hende kier tin poder pa domina y mata otro hende, pero ningun di e criminal nan ey cu ta haci guerra y destrui, tin e poder pa lanta un hende for di morto, tur nan concentracion ta riba destruccion, Den e buki di Esdras capitulo 3 vers 11 ta para scirbi:Y  nan a canta, y duna alabansa, y gradicimento,na Señor bisando:

Pasobra E ta bon, pasobra su misericordia ta riba Israel pa semper. (Awe nos tambe por haci mescun cos y pidi Dios su misericordia riba nos hogar y nos Pais). Salmo capitulo 7 vers 17 ta bisa:Laga e asamblea di pueblonan rondona Bo y goberna riba nan fot di e altura nan.

Salmo 100 vers 4+5 ta bisa:

Drenta su portanan cu gradicimento, y Su plenchi nan cu alabansa,duna E gradicimento, bendiciona Su nomber, pasobra Señor  ta bon : Su misericordia ta pa semper,y Su fieldad ta pa tur generacion. E enemigonan di Dios, cual e diabel ta mantene den scuridad, mester yega na e Luz berdadero cual ta Cristo Hesus, pa duna gratitud na Dios pasobra ta para scirbi: Cu pa e nomber di Hesus tur rudia mester dobla , di esnan cu ta den cielo, riba tera y bao di tera, y cu tur lenga mester confesa . Cu hesus Cristo ta Señor pa e Gloria di Dios Tata.

No tin caminda pa discucion, ni tampoco ningun argumento, nos Dios ta bon y su misericordia ta pa semper, y no tin ningun hende pa bisa cu Dios a haci malo cu nan. Ora nos mira maldad lanta, nos tin di corda , cu Dios tin poder pa caba cu tur maldad, y pronto E lo bini pa haci esey, pesey ta keda na nos awe pa duna gradicimento, y yena nos curazon cu su Palabra, laga Dios goberna nos bida, pa asina nos tin Fe y speransa den e bida eterna cu solamente Dios por ofrece. Awendia tur cos a bira un app, pero serca Dios nos ta yega cu humildad, na rudia rogando, y dunando gratitud cu nos boca, pasobra Dios ta bon y su misericordia ta pa semper. Ora hende grandi ta alaba Dios ,muchanan lo conoce e secreto di gradicimento. Pastor Marcel Balootje. 





Source link

More in Aruba

To Top