Santa Rosa: Tiramento di sushi na dam ta un problema grandi

Den e temporada di secura manera custumber Departamento di Agricultura, Cria y Pesca, Santa Rosa ta hasi su controlnan pa mira e disponiblidad di awa di dam. 

Manera a publica den un comunicado di siman pasa tin varios dam cu ta bashi. Tin algun cu no ta dispone di mucho awa mas tampoco. Ta simplemente mester bay baha un poco e servicio di entrega di awa di dam pa asina tur clientela por haya maske ta un of dos truck. 

Durante di e controlnan aki di bishita algun dam primordial a tuma nota cu keto bay tin individuonan cu ta keda tira sushi na e damnan aki. Pa añanan largo ta trata na conscientisa e personanan pa no tira sushi den e damnan rond Aruba. Pero keto bay esaki ta keda pasa. Na varios ocasion e trahadonan di Santa Rosa mes ta bin haya damnan cu a bira un luga cu ta keda tira sushi. 

Dam di Tankileendert ta un dinan. Dam di Hooiberg ta keda esun cu mas sushi ta keda tira cu mas frecuente. Ta hacie limpi awe y ya e dia siguiente tin sushi tira atrobe. Debi na e tantisimo biaha cu ta haya sushi tira na e dam di Hooiberg aki, Departamento di Agricultura, Cria y Pesca Santa Rosa a tuma e decision pa cera e dam temporalmente pa asina limita e acceso pa yega te na e dam pa tira e sushi. 

Pa sorpresa tabata cu e individuonan aki a dicidi di tira e sushi net caminda cu a cer’e. Kiermen yega tira e sushi eybou mes. Asina por sigui menciona. Ta compronde tambe cu e ceramento ta causa molester na esnan cu si ta haci bon uzo di e awa di dam cual ta e productornan. Esaki ta haci cu ta limita e acceso pa yega na e awa. Un situacion cu ta bira frustrante pa e agricultor cu kisas e ora mester bay un distancia mas leu na un otro dam pa e por haya poco awa pa muha su cultivo.

Durante di control a bin tuma nota cu tin sushi di pallet tira na canto di e dam di “Pal’i Boonchi” cu ta e dam cu ta situa poco panort di Weng Kee Supermarket na Pierdaplaat. Berdad ta cu no tin awa mas den e dam ta simplemnte e parti abou ta lodo cu ta hasi esaki poco dificil pa Santa Rosa por haci trabou di limpiesa y mantencion pero esey no ta nifica cu eta un luga pa bay tira sushi.

Santa Rosa ta sigui haci e apelacion na henter comunidad di Aruba pa no tira ningun tipo sushi na e damnan. Corda cu e por contamina e awa y manera tu hende sa e awa di dam ta wordo usa pa nos agricultornan pa muha nan cultivo di fruta of berdura y tambe cria di bestia. Esaki sigur por trece un problema hopi serio.

Bo tin sushi pa tira afo tuma un tiki mas tempo prepara bo sushi y tira esaki afo na companianan cu ta disponible pa tuma e sushi. Un di nan sigur ta ECOTECH situa na Barcadera caminda sin ningun problema bo por tira tur sushi afo eynan. Sea ta mata, pallet of cualkier tipo di sushi. Pero no na e damnan cu tin tin caminda e awa ta wordo usa riba produccionnan cu ta pa consumo local.