Connect with us

Santa Rosa a ricibi resultado di encuesta for di Universidad di Aruba

Aruba

Santa Rosa a ricibi resultado di encuesta for di Universidad di Aruba


Gobierno di Aruba, tin como un di su metanan principal ta pa stimula e Sector Primario di Aruba. No solamente pa logra siguridad di cuminda pa e comunidad pero alabes brinda e oportunidad na nos hobennan pa bin mas den contacto cu e sector aki y conoce kico ta e contribucion cu esaki ta representa pa nos comunidad y futuro generacion. Esaki ta un tema cu mundialmente ta mira como un prioridad, specialmente awor cu no solamente e cambionan climatico ta hunga rol, pero tambe e situacion tenso cu tin entre paisnan den desacuerdo. Esaki sigur ya a demostra su impacto den prijs y disponibilidad di cierto producto di consumo. 

Durante e ultimo añanan Santa Rosa a logra introduci diferente proyecto den cual a wordo diseña specialmente pa den un forma educativo pero na mes momento participativo, hiba e conocementonan di plantamento, criansa y pesca cerca nos hobennan sea na scol of otro centronan educativo pa mucha y hoben. Pa menciona algun, Santa Rosa ta ofrece workshops n’e scolnan cu ta encera plantamento, ta ofrece workshops specialmente pa docente, pa nan por tin e conocemento basico na momento di splica referente e tema of crea area di plantacion na nan scol. Durante vakantie e gruponan por haya rondleiding cu e posibilidad di haya workshop referente plantamento. Na 2019 a inicia cu e proyecto “Hofi di Amistad” cu e meta pa crea hofinan escolar mediante un plan di mantencion diseña door di e studiantenan mes. Pa e proyecto aki tin dos scol cu ta formando parti di dje y cual ta haci posibel pa midi e desaroyo y exito di cada un individualmente. Asina pocopoco por bay ahustando e modelo den e structura cu ta mas duradero y practico pa logra e meta principal y efectividad di cada hofi. Nos ta consciente cu den algun ocasion, tin scol cu tin e deseo pa tin nan propio hofi escolar, pero pa motibo di algun aspecto, ta haci esaki dificil pa realisa. Algun ehempel ta entre otro e gastonan di irrigacion of mantencion como tambe e compromiso pa sigui mantene e hofi durante temporada di vakanti. Santa Rosa ta orguyoso di por confirma cu a pesar di e dificultadnan, tin varios scol cu toch ta sigi purba pa crea un área chikito caminda cu e muchanan por toch tin e contacto cu e sector aki den un forma mas pasivo.

Como parti di Santa Rosa su responsabilidad pa crea y ehecuta proyecto cu tin un impacto educativo y hunto pa logra concretisa e metanan pa cual e proyecto a wordo desaroya. Tabata importante pa haci estudio encuanto di e posibel resultadonan pa futuro por respresenta y cu por determina tambe con ta recomendabel pa esaki wordo adapta pa logra tin mas efectividad. Un di e proyectonan cu Santa Rosa tabata desea di evalua pa por crea un plan di maneho mas concreto, ta e posibilidad di stimula mas hofi  escolar rond di Aruba. Di acuerdo cu e Director di Santa Rosa, Nathalie Maduro, “Cada hofi escolar cu ta wordo crea cu un proposito educativo y wordo bon manteni, ta un herment valioso cu ta sirbi pa concientisa y stimula nos hobennan encuanto e importancia e responsabilidad di un pais pa establece siguridad di alimento saludabel pa su comunidad y alabes wordo identifica como un carera profesional cu den futuro lo contribui enormemente na logra menos dependencia di importacion di cuminda for di exterior y crea oportunidad laboral.”

Na luna di maart 2022 Santa Rosa a entrega e tema di estudio na Universidad di Aruba como parti di un proyecto pa studiante nan por asisti cu ehecucion di estudio. Aki e dos studiantenan, Taisha Henriquez y Zayliyah Danje ambos atendiendo e Facultad di Social Works a wordo escohi pa hunto cu e gerencia di Santa Rosa inicia cu e estudio mediante un encuesta referente e tema “Why are School Gardens an added value to Aruba’s Food Security and Children’s wellbeing?” E studiante nan a haya diferente informacion y dato pa wordo studia y na mes momento a haci bishita na e dos proyecto ya existente como tambe a bishita otro instancianan caminda den pasado Santa Rosa a coopera cu workshop y material di plantacion. Otro aspecto importante y interesante di e estudio ta, a encera un encuesta cu a wordo manda pa docente, ex-docente, mayor, profesional y hefenan di Departamento pa por a logra haya un bista mas amplio con e gruponan aki ta mira e efectividad di desaroya mas hofi escolar y ki impacto esaki tin riba e mucha su salud y desaroyo. E resultado a mustra cu cifra cu tin un interes grandi di parti di parti di tanto e docente y mayornan y cu ta reconoce e beneficio di stimula e tema di plantacion di cuminda for di trempan cerca e muchanan. Sinembargo tin e limitacion financiero y compromiso pa cu e mantencion di e hofi cual ta keda un contratiempo. Pero awor cu tin un bista mas cla conclui for di e resultado di e encuesta. Santa Rosa tin un bista mas concreto awor di e futuro di e proyecto aki y lo traha awo riba posibel solucionnan pa haci di cada hofi escolar uno exitoso. 

Mester remarca cu e studiantenan a crea un bunita poster informativo riba nan propio iniciativa cu ta ilustra e cinco caracteristicanan cu ta hasi di un hofi escolar un herment beneficioso riba diferente area tanto social, nutricional y como tambe desaroyo propio cerca e muchanan. 

Pa medio di esaki, Gerencia di Santa Rosa ta gradici Yolanda Richardson, Docente Module Introduction to Research Methology pa e Facultad di Arte y Cencia na Universidad di Aruba pa su cooperacion. Ta yama danki na e dos studiantenan, Taisha Henriquez y Zayliyah Danje cu den un forma hopi profesional y dedica a ehecuta e estudio aki y entrega e raport completa na Maduro den presencia di Ludwig Rasmijn encarga cu proyecto escolar. 





Source link

More in Aruba

To Top