Reunionnan na Corsou riba e tema di Ennia tabata productivo

Diaranson 27 di maart Prome Minister Evelyn Wever-Croes y un delegacion di Aruba tawata na Corsou pa atende algun reunion entre otro riba e tema di ENNIA. E delegacion di Aruba a consisti di Minister di Finansa Xiomara Maduro, presidente di Banco Central Jane Figaroa-Semeleer y consehero di Gobierno Nilo Swaen.

Durante e dia aki a reuni cu Prome Minister di Corsou Gilmar Pic Pisas, Minister di Finansa Javier Silvania y tambe cu ehecutivonan di Banco Central di Corsou y Sint Maarten (CBCS). Reunionnan pa atende e asunto di ENNIA a bai bon. Durante e reunion aki, tambe nan a delibera riba hopi otro tema importante. Un di e temanan aki y di interes mutuo ta esun di refinanciamento di e debe di Covid cu ta un tema importante pa e dos islanan. Akinan Prome Minister a indica cu semper ta importante pa Aruba y Corsou ta bon alinea y asina un por yuda otro.

“Tawata un dia largo pero hopi productivo y positivo, cu bon reunionnan, na unda nos a logra yega na bon conclusionnan. Manera semper e tawata un placer di por a bishita nos hermana isla Corsou un biaha mas”, Prome Minister a expresa.