Connect with us

Raymond Maduro (ALVAST): Suspende Anthony Irausquin of ta pone ELMAR plat!

Caribe

Raymond Maduro (ALVAST): Suspende Anthony Irausquin of ta pone ELMAR plat!


image11

“Loke cu e trahadonan den un carta habri a manda pa Parlamento, pa Minister Presidente, pa Minister Glenbert Croes y pa Utilities Aruba NV, den cual trahadonan malcontento di NV ELMAR ta entrega un lista di asunto dudoso y cuestionabel den maneho di e compania di distribucion di coriente, ta un asunto hopi serio”, asina Raymond Maduro, presidente di Algemene Vakbond der Stafleden (Alvast) a vocifera.

For di dia 11 di juli 2022 caba ALVAST, cu ta representa e staf na NV ELMAR, ya a vocifera nan disgusto na Ton Rojer di Utilities Aruba NV pa cu e mal maneho y falta di comunicacion di Anthony Irausquin.

image11

Dos aña a pasa y e maneho no a drecha. No tin comunicacion ni respet pa sindicato. Ta haci y deshaci, ta anti trahado y anti sindicato, no ta sinta cu sindicato y tin hopi problema den compania cu mester di atencion. “En bes cu e busca un manera pa soluciona e problemanan, ta biaha cada rato y ta prefera di laga e departamento di recurso humano mes atende e retonan y despues no ta tende nada mas. Un maneho desastroso cu mester un investigacion profundo, manera cu e trahadonan malcontento a trece padilanti, segun Raymond Maduro a expresa.

Sindicato ta urgi Minister Glenbert Croes pa laga haci un investigacion riba e director di NV ELMAR ariba e lista di asunto dudoso y cuestionabel den e maneho di compania cu trahadonan a manda den e carta. “Sindicato kier mira un investigacion priva tuma luga. No laga Utilities Aruba (Ton Rojer) haci e investigacion. Pero pa por garantisa un investigacion profundo, mester prohibi entrada y suspende e director. Kita su badge y acceso na e compania pa asina por busca un compania priva cu no tin laso cu e director ni cu Utilities Aruba pa laga haci e investigacion”, asina Raymond Maduro ta exigi.

image016

E sindicato ta boga pa Minister Glenbert Croes laga haci e investigacion mesora y si esey no sosode, lo pone e mandatario y Utilities Aruba responabel pa tur loke por pasa den e compania ya cu e trahadonan ta masha rabia y disgusta cu maneho di Anthony Irausquin.

“Sindicato lo vigila e proceso di cerca y si no laga haci e investigacion, posibilidad ta cu lo por pone NV ELMAR plat pasobra e trahadonan ta disgusta y rabia”, asina Raymond Maduro a termina bisando.





Source link

More in Caribe

A2Z ADMINISTRATION

AD

To Top