Connect with us

Pronto na Aruba: Lo devela un monumento na memoria di Tino Riuz

Aruba

Pronto na Aruba: Lo devela un monumento na memoria di Tino Riuz


E ekipo di 24ora.com ta na Bogota relaciona cu diferente reportahe special. Entre nan, a entrevista Gilbert Senchi, e ta un artista internacional cu un catalogo di arte hopi amplio. Senchi a traha diferente artesania rond mundo y pa diferente gobierno. E tin un relacion di cerca cu Cas Real di Hulanda. E arte di Lolita na San Nicolas ta un di e artenan cu Gilbert Senchi a yeg’i traha. 

Actualmente e ta bezig cu dos proyecto pa Aruba. Un di nan ta riba peticion di Minister di Husticia, Rocco Tjon. Tjon a pidi Senchi na nomber di gobierno di Aruba pa traha un monumento na memoria di Tino Ruiz, kende a fayece den pleno ehecucion di su trabou como polis. Actualmente tin un porta di patruya cu cara di Tino pinta riba dje dilanti di Warda di polis na Shaba. Tjon for di tempo e tabata den parlamento a traha riba mocion pa concretisa un proyecto na memoria di Tino Ruiz, awo cu el a bira minister, el a ehecuta su plan cu e tabatin planea. 

E studio di Gilbert Senchi ta situa den e parti sur di Bogota. Ey ta caminda e traha riba su artenan y djey ta exporta nan sea pa Aruba of e pais cu e cumprado a pidi. 

Gilbert Senchi a conta cu e proyecto aki pa memoria di Tino Ruiz ta un proyecto cu e personalmente no ta gusta haci, mirando cu e trece cu ne un momento hopi emocional. Pero ta importante pa hacie pa conscientisa pueblo di e trabou importante di polis. E monumento na memoria di Tino Ruiz ta tumando basta tempo, mirando cu famia mes ta bin te Bogota pa inspecciona, adapta y aproba e arte aki. E tata di Tino mes a traha riba e monumento aki mientras ta graba tur cos via Zoom pa e mama di Tino aproba. Pues, ta encera un poco mas tempo pero famia no tin problema cu e tardansa, basta e keda bon. 

E proceso ta tuma largo, mirando tin cu saca copia prome den gips djey pa wax sigui pa santo y na final den brons. Apart di e monumento, tin un estudio special cu a tuma luga p’asina garantisa cu tur cos ta cuadra, entre otro e parti di uniform, rango, dashi, logo di Cuerpo Policial y mas. A combersa cu varios experto prome cu a cuminsa traha riba e proyecto aki. 

Ta premira cu den algun siman sino ta luna lo finalisa cu e proyecto aki. E monumento aki lo bin riba un plasa special, cu ainda DOW no a traha. E plasa lo ta situa dilanti Warda di Polis cerca di Rio Grandi. E monumento lo ta cara pabou pa motibo cu un poco mas pabou ta e cas unda Tino Ruiz a crece cerca su mayornan. 

Como aprecio, Gilbert Senchi a regala Nelson Speed Andrade un arte hopi special. Ta trata di un parti importante di e uniform di Cuerpo Policial, claro den un arte traha pa Gilbert Senchi mes. Nelson Speed Andrade tambe a yuda pega klei na e momento memorial di Tino Ruiz, cu pronto lo revel’e pa Aruba. Senchi a scoge e arte aki mirando cu a nota cu Andrade su curason ta bati duro pa Cuerpo Policial y ta traha practicamente tur dia cerca di polis. Na nomber di headlines group, e cas editorial di 24ora.com y TREMPAN, Andrade a gradici Senchi pa e regalo special aki y a sigur’e cu e tin un luga special cerca di dje na Aruba.





Source link

More in Aruba

To Top