Connect with us

Presidente di Piskabon Ernest de Lanoy a entregá retiru despues di pregunta krítiko

Caribe

Presidente di Piskabon Ernest de Lanoy a entregá retiru despues di pregunta krítiko


Boneiru

Presidente di Piskabon Ernest de Lanoy a entregá retiru despues di pregunta krítiko

Diputado Anjelica Cicilia ta admití di a hasia vários pregunta krítiko na presidente di Piskabon, pero ta bisa tambe ku deliberashonnan ku e koperativa lo no mester kana via di prensa. Pòtret: ABC Online Media

KRALENDIJK – Dia djasabra merdia a yega notisia ku presidente di Piskabon a tuma su retiru. Ernest de Lanoy te asina leu tabata na timon di e organisashon ku ta defendé e interés di e piskadónan na Boneiru. 

Segun diputado Anjelica Cicilia, ta parse ku preguntanan krítiko dirigi na Piskabon, inkluyendo e kontrato di kuido aktuál, por ta e motibu ku e presidente a renunsiá.

Piskabon di su parti  a komuniká ku De Lanoy a tuma desishon pa renunsiá despues di un reunion ku diputado Anjelica Cicilia. Mientrastantu direktiva di e koperativa a akseptá e retiru di De Lanoy i a laga sa ku nan tabata wardando  un splikashon di Entidat Públiko Boneiru (EPB). 

Ku esaki, no a keda totalmente kla kiko a kondusí na retiru di De Lanoy. Tin hende ta spekulá ku un konflikto entre Piskabon i e charternan di peska, tambe por a hunga un ròl. Ounke ABC Online Media a purba haña mas informashon di Piskabon, direktiva a laga sa ku nan ta den un diálogo interno i ku señor De Lanoy no tabata disponibel pa duna un reakshon. 

ABC Online Media a tuma kontakto tambe ku diputado Cicilia pa pidi esaki un aklarashon riba e akontesimentunan. “Via medio di komunikashon mi  tambe a tende ku Ernest de Lanoy a presentá su renunsia. Ki ta e motibu presis, mi no sa. Posibelmente ela konsiderá e preguntanan ku mi a hasi na dje demasiado krítiko,” asina Cicilia a bisa. 

Segun Cicilia ku tambe via medionan di komunikashon De Lanoy a laga sa ku lo kòrta supsidio di e koperativo na mitar. “Mi a indiká na señor De Lanoy ku no ta sabí pa hiba e kombersashonnan aki via di prensa, i ku lo ta mihó pa komuniká direktamente ku gobièrnu”. 

Supsidio i pregunta

Segun Cicilia a indiká, Piskabon ta risibí anualmentu un supsidio di 150.000 dólar for di EPB. Di esaki 105.000 ta gastu di personal, 22.000 dólar pa akomodashon i solamente un 20.000 dólar pa ehekushon di projektonan. “Naturalmente mi a hasi preguntanan krítiko riba esaki i mi a pidi pa duna un reakshon dentro di kuater siman. Mi a hasi  preguntanan tambe tokante kon e presidensia ta organisá na Piskabon. Ku otro palabra, kon e proseso di rotashon ta. Señor De Lanoy no a kontestá mi preguntanan, pero si a laga sa ku e ta entregá su retiru”, asina Cicilia a konkluí.


45



Source link

More in Caribe

A2Z ADMINISTRATION

AD

To Top