Connect with us

Post Aruba cu descripcion di e stampianan nobo

Aruba

Post Aruba cu descripcion di e stampianan nobo


Cua ta e diferente tecnicanan di piscamento?

E cinco metodo basico di piscamento ta pisca cu has, pisca cu musca, tiramento di has, tira y lastra reda. Pisca cu has, of manera tambe nan ta yam’e pisca den fondo, sin duda ta e metodo mas anticua y universalmente uza.

Pisca na baranca di Aruba:

Piscamento na baranca ta tuma luga cu hengel, liña y anzue. Na Aruba, nan ta uza blaas y tambe nan ta tira liña. Na e parti Nort di Aruba nan ta pisca na baranca y generalmente nan ta tira liña na man. E ta un trabou bastante peligroso, net unda tin baranca skerpi y ola grandi.

Na Malmok, Arashi, Boca Catalina y Tres Trapi, ta luganan cu nan ta pisca hopi cu ayudo di blaas; debi na e biento fuerte riba lama, e has por bay leu for di costa.

Piscamento cu blaas ta un poco controversial; e blaasnan di plastic ta malo pa e medio ambiente. Bon ta, cu hopi piscado ta uza awendia blaasnan biodegradabel.

Piscamento na baranca ta tuma luga tanto cu has artificial como has natural. Aunke cu piscamento na fondo di lama generalmente ta basa riba has natural, nan ta uza tanto e has natural como esun artificial na diferente forma di pisca na baranca mes tambe.

Piscamento riba lama di Aruba:

Como luga di biba di algun di e piscanan renombra mas grandi di Caribe, Aruba ta subiendo lentamente na top di cualquier lista di deseo di piscamento. Nos isla chikito dilanti costa di Venezuela tin un tremendo clima durante henter aña, beachnan colorido y un escena vibrante di piscamento. E botonan di pisca (charters) di Aruba ta hiba bo na awanan hundo pa busca trofeonan pelagico. 

Mas ariba di e lista di piscanan cu bo por pisca aki, tin un gran cantidad di sorto iconico di pisca grandi. Esakinan ta inclui marlin blauw y blanco, pisca di bot’i bela, Mahi Mahi, varios sorto di tonino y wahoo. Si bo ta prefera di keda mas cerca di costa, e awa di costa tambe ta emocionante.

Na un distancia di mas o menos 2 miya di costa, e awa ta bira mas hundo. Esaki ta nifica cu piscamento riba lama grandi ta accesibel tambe pa e piscadonan cu a resta solamente mita dia pa logra un “Grand Slam di Caribe”.

‘Taray’

Taray, tambe nan sa bisa ‘tira taray’ na Papiamento, ta un net of reda cu nan ta uza pa coy pisca. Esaki ta un net cu wowonan rondo y na e rand e tin pesonan chikito di chumbo. Nan ta tira e taray di tal manera cu e ta expande su mes den aire prome cu e sink den awa.  E tecnica aki nan ta yama tira of tira taray. Asina nan ta captura e piscanan ora cu ta trece e taray aden.       

E aparato simpel aki, particularmente efectivo pa gara has chikito (masbango, anchovis) ya tabata den uzo pa miles di aña caba, cu diferente modificacion.

Piscamento tradicional na Aruba:

Piscamento tradicional ta tuma luga cu botonan “chikito” di palo traha door di e piscado mes. Aki, nan ta aplica diferente metodo.

Un di e metodonan ta cu un grupo di boto chikito y buceadonan cu ta uza reda grandi pa captura piscanan chikto cu nan ta uza como has. E buceadonan ta bay busca balanan di has di e piscanan chikito. E barconan ta keda nabega den forma di circulo mientras ta tira e redanan di pisca. E buceadornan ta cera e redanan pa asina niun pisca por scapa.

Un otro manera ta pa uza liña na man y pisca gordo como has den forma di circulo, pa asina trata na atrae e piscanan grandi, manera picuda, wahoo, gonofis y mahi mahi.

Loke tambe nan ta haci ta bay pisca na rif y na cabes di algun lomba di santo. Un di e lombanan di santo ta cerca di Venezuela y nan ta yam’e ‘barra’. E piscadonan ta tira nan hancro y asina ta uza plataformanan di awa hundo pa piscamento den fondo. Nan ta purba haya pisca cora y pargo.





Source link

Click to comment

Leave a Reply

Your email address will not be published.

More in Aruba

To Top