Connect with us

Por pasa eleccion den prizon pa bendemento di voto

Aruba

Por pasa eleccion den prizon pa bendemento di voto

Ta parce cu no tur hende ta consciente ainda cu eleccion parlamentario ta un asunto seri, mescos ta henter e organisacion cu tin rond di dje. Nos leynan penal ta stipula cu si un hende bende su voto of pone na benta den forma publico, cu ta e castigabel pa ley. Por bay cera y hasta pasa eleccion tras di tralie, si autoridad gara bo ta bende of solicita pa bende bo voto.

Articulo 2:44 di nos codigo penal ta stipula e asunto aki den forma cla. Tin castigo di prizon pa esun cu purba cumpra voto di un votado, por medio di placa, regalo of door di priminti un fabor. E ley ta papia aki di sea castigo di prizon cu un maximo di dos aña of multa. Pero…e moneda aki tin dos banda of manera ta bisa na Ingles, “it takes two to tango”. Pues, esun cu ta laga su mes wordo cumpra of corumpi pa vota pa un politico a base di promesa of placa, tambe ta bay cera pa un maximo di dos aña di prizon.

Por pasa eleccion den prizon pa bendemento di voto 9

Den e ultimo dianan aki a nota riba Facebook varios persona, kisas door di nan circunstancia economico of di trabou, a opta pa pone nan voto na benta. Y nan no ta haci esaki di forma discreto, sino publicamente y cu palabranan directo ta pidi 500 florin for di e politico cu kier pa nan voto pa nan. Por lo menos un votado, M. Carrion, a pone su oproepingskaart riba Facebook, den cual ta publica su nomber completo, su fecha di nacemento, su adres y su stembureau unda e lo vota diabierna dia 25 di juni 2021. El a skirbi riba e “post” cu “500fl no ta baha malo. Ken ta paga mi pa mi vota pe?”

Pero no ta e mucha muhe aki so, pasobra un otro hende homber a los un oferta mucho mas caro, den cual e ta pone su voto na benta na balor di mil florin. E ta pidi pa tur politico cu ta desea di haya su voto, pa tuma contacto cu ne y si tin mas cu un interesado, cu e lo bay by way of un sistema di bid. Na ultimate, el a indica di lo prueba pa ken el a vota door di saca un potret di su stembiljet cu e voto riba dje.

Mester menciona atrobe cu henter e hazaña aki ta ilegal y condenabel segun nos codigo penal. E asunto di publica cu bo voto ta na benta, ta haci bo un sospechoso di husticia mesora. E otro asunto di compromete cu lo bo saca potret di bo voto cu bo celular, tampoco ta permiti. E ta bira parti di e complicidad cu bo ta votando bou presion di sea placa, regalo of promesa di un fabor.

Por pasa eleccion den prizon pa bendemento di voto 10

Eleccion parlamentario 2021

Eleccion pa parlamento di Aruba ta sosode diabierna dia 25 di juni 2021. Publico por vota for di 8:00 am te cu 7:00 pm na e 70 diferente urnanan electoral, reparti tur rond di nos isla.

Na tur tin un complete di 70.281 ciudadano cu derecho di voto riba e dia ey. Di e cantidad aki, 28.357 ta di e generacion “Baby Boomer” of mas bieu, pues di prome cu aña 1964. Di e generacion di 1965 pa 1980, conoci como e “Generation X” tin 18.570 votado. Di e ultimo generacion, conoci como “Generation Y” of tambe “Millennials” tin un complete di 23.354 votado. E grupo mas grandi di votado tin entre 55 pa 59 aña di edad, sigui despues pa e grupo di 60 pa 64 aña di edad. 

Un complete di 12 partido lo participa na eleccion di e aña aki. Ta prome biaha den historia politico di pais Aruba cu tin tanto partido asina ta bay eleccion. A numera e partidonan y nan coloration di tal forma: 

  1. Accion 21 – coloration shinishi cla
  2. Partido Patriotico di Aruba (PPA) – coloration oraño
  3. Movimiento Aruba Soberano (MAS) – coloration blauw cla
  4. Union Patriotico Progresista (UPP) – coloration cora
  5. Movimiento Electoral di Pueblo (MEP) – coloration geel
  6. Hubentud Treciendo Cambio (HTC) – coloration ros cla
  7. Pueblo Orguyoso y Respeta (POR) – coloration blauw scur
  8. Arubaanse Volkspartij (AVP) – coloration berde
  9. Pueblo Prome (PP) – coloration biña cla
  10. Cristiannan Uni Reforsando Potencial di Aruba (CURPA) – coloration biña scur
  11. RAIZ – coloration shinishi scur
  12. Red Democratico (RED) – coloration blanco



Source link

More in Aruba

IMPORTANT ANOUNCEMENT

Advertisement
Advertisement

Trending

Advertisement
Advertisement
To Top