Plan di contingencia ta na su luga pa mitiga potencial aumento di migrante na Aruba

Durante un conferencia di prensa dialuna, Minister di Husticia y Asuntonan Social, Rocco Tjon, pone enfasis riba varios reto cu e pais ta enfrenta den termino di migracion, specialmente considerando un posibel reapertura di e frontera aereo cu Venezuela. E discusion a dal buelta rond di e preparacion y e medidanan di contingencia cu e gobierno tin pa maneha un potencial aumento di migrante, como tambe e capacidad di e personal pa maneha e retonan aki.

Minister Tjon a splica cu e plan di contingencia ta na vigor durate varios aña caba y ta adapta continuamente segun e necesidadnan. “Nos tin diferente grupo di trabao cu ta duna recomendacion regularmente tanto na Prome Minister como mi persona, pa evalua constantemente si nos ta mantene e fronteranan cera of no. Esaki ta un proceso continuo,” Tjon a afirma.

El a subraya e inversionnan significativo realisa den e siguridad di e fronteranan, incluyendo radar y camara cu ta hunga un papel crucial den e puntonan di entrada. “Esaki ta permiti un cooperacion ainda mas eficaz cu Wardacosta. No solamente ta trata di radar, sino tambe di e software cu ta permiti analisis preciso. Den termino di siguridad na frontera, nos a haci inversion grandi den e ultimo añanan,” el a añadi.

E Minister tambe a destaca e papel importante di e ekipo di vigilacia na costa y e tecnologia avansa uza pa monitor e situacion. “Di e manera aki, nos ta purbando di mitiga e posibel riesgonan. Nos departamentonan di inteligencia y informacion tambe ta priorisa e aspecto aki. Si tin informacion of inteligencia oportuno, ta señala esaki di inmediato pa tuma e accionnan necesario.”

CONTROL MIGRATORIO Y IMPACTO RIBA VUELO

Relaciona cu e controlnan migratorio y su impacto n’e vuelonan, specialmente esunnan cu ta dirigi p’e region di Latino America, Tjon a trata e preocupacionnan aki riba e retrasonan y e eficiencia di e fluho di turista. “E intencion ta pa yega na un formula caminda e control ta tuma luga den e pais di origen prome cu e personanan bula pa Aruba. Si e no cumpli cu cierto rekisito e no ta yega Aruba, ya cu e aerolinea ta want’e,” Tjon a splica.

“Si esaki no ta posibel pa algun motibo, e ora e control lo tuma luga na Aruba p’e Departamento di Migracion. Ta crucial haya un balans. Di un banda nos mester ofrece bon servicio n’e turistanan p’e fluho ta eficiente y lihe. DI un otro banda, nos no mester lubida di e siguridad,” el a conclui.

E gobierno ta mantene reunion structural cu e departamentonan cu ta depende di e Ministerio di Turismo y como tambe e Departamento di Migracion pa sigura cu e medidanan di siguridad y servicio ta implementa di manera efectivo y balansa.