Pastoor Jairo Maduro: Aruba mester haya Status Aparte di Obispado di Corsou

“Mi no ta desconoci pa boso, algun ta yama mi Jairo, Pader Jairo of Pastoor di Santa Cruz. Mi ta yiu di e pueblo aki. Hende di Parkietenbos, Cas di Paloma y Dakota(tur dia). Mi tin 18 aña caba como sacerdote di misa catolico Romano, na mes tempo un hende hopi feliz den e Yamada cu Dios a haci mi”, asina e pastoor a cuminsa bisando.

“Tin hende ta gusta mi y otronan no, pero mi no ta worry cu esey. Cu Dios ta gusta mi ta mas cu suficiente.”

“Pero siendo di e isla aki, mi kier comparti algo cu boso cu hopi tempo ta den mi curason y mi ta bai bis’e sin miedo ya cu mi sa cu e no ta algo malo y tampoco e no ta algo contra ningun hende. Mi a papia cu algun hende di mi pensamento, algun a bisa mi cu mi ta soña mucho y otronan a bisa esey ta un bon idea. Tin a bisa mi cu esey ta algo cu por tarda, pero Las cosas de Palacios se van de espacio”.

“Mi rumannan, pa no ta largo…ta tempo pa Aruba bira sea un Vicariato Apostolico of un Bisdom cu nos propio Obispo! Nos tin Status Aparte esta un status “Pais” desde 1986 kiermen nos ta un pais cu Gobernador, Gobierno, Parlamento, nos mesun ley, nos mesun moneda, propio ortografia di nos dushi Papiamento. Nos pais a madura y crece den cosnan bon y tambe menos bon.”

Mas leu, e Pastoor a bisa cu “Na mi parecer, na nivel di Iglesia nos a cay un poco atras, nos ta bay slow! Corda mi ta yiu di e pueblo aki, mi mag di expresa loke mi ta mira….Bo kier sa mas kico esey lo nifica pa nos Catoliconan cu Aruba, sea e ta bira un Vicariato Apostolico of Bisdom? Awel laga mi sa bo pensamento y lo mi sigui papia e asunto”, asina Pastoor Jairo Maduro a termina bisando.