Connect with us

Pa intento di asesinato: Castigo di 7 aña ta colga riba cabes di Jean-Pierre Croes

IMG 9897

Caribe

Pa intento di asesinato: Castigo di 7 aña ta colga riba cabes di Jean-Pierre Croes


IMG 9897

Ministerio Publico a trece un serie di acusacion dilanti contra e acusado Jean-Pierre Croes, di cual e dosnan mas serio tabata su intento pa asesina dos homber. E homber aki di 37 aña a bati dos hende homber di edad malamente y laga nan cu daño pa resto di nan bida. Fiscal a pidi un castigo di shete aña. Sinembargo ainda no tin fecha p’un decision.�

Tristo den e caso aki, cu a tuma luga aña pasa october, ta cu a laga traha un rapport di Psycholoog kende a conclui cu  Jean-Pierre ta menos responsabel pa su actonan y cu no tin duda cu e mester di tratamento. P’esey su abogado a pidi corte pa no bay di acuerdo cu e demanda di fiscal.�

Di loke cu a bin dilanti durante tratamento di e caso por saca afo cu e acusado aki tin un problema serio cu adiccion. E mes ta bisa cu e dia ey e tabata riba un racha di “piedra di coca” ora cu el a bati e dos hende hombernan na Parkietenbos.�

E echo

Riba 10 di october 2023, el a cuminsa cu su racha fo’i trempan, bebiendo alcohol. Bou influencia el a dicidi di horta un auto na Primavera, pasobra cana di Playa te su cas na San Fuego ta demasiado p’e.�

Pero en bes di bay cas, el a sigui pa San Nicolas, unda el  haya discusion cu un barbero Dominicano, for di kende el a horta placa.�

Declaracion bruha

Su declaracionnan tabata un poco bruha si, pasobra diripiente el a bisa cu el a bay Parkietenbos pa mira un camber cu e kier a huur na cas di e mayornan di su amigo. E ta bisa, cu e tabatin un caha cu shete (7) mil florin cu el a laga poni riba un mesa, pa e bay wak e camber. E no por a duna un splicacion for di unda el a saca e suma grandi di placa.�

E ta sigura di tabatin e suma grandi di placa cu a disparce misteriosamente na momento cu el a caba di wak e camber. P’esey el a reclama F.S. pa su placa.  Cos a sali for di man, pasobra el a bati e victima aki malamente cu un biga. Tabata e grito di dolor di F.S. cu a pone e homber A.C. yega pa brind’e ayudo. Pero e tambe a haya basta sla.�

Jean-Pierre a duna un version diferente, esta cu ta e dos hombernan aki a atac’e y el pensa cu nan ta bay mat’e. Den su declaracion ta para cu F.S. a hinc’e na su pia. Pero no tin ningun marca di hinca. Den e lucha, e dos hombernan aki a kibra su paña y p’esey el a dal nan cu biga.�

E momento ey, segun su declaracion, el a haya chens di huy sunu y cu e caha bou brasa. El a tuma direccion di ATCO pa horta un truck y asina polis ta yega pa e haya ayudo. Tambe el a bisa cu e trahadonan di ATCO a batie.�

Unico cos cu ta para den e proces-verbaal ta cu Polis a hay’e sunu y e no tabata herida. Pues ningun lesion na su curpa.  Tampoco a haya mancha di sanger.  Den corte el a bisa cu e no a realisa cu el a dal e hendenan asina pisa. Pero cu el a bay defende su mes di nan.�

Consecuencia pa e victimanan

E victimanan a keda cu diferente lesion hopi serio. E victima S. a haya varios sla na su cabes, diferente hinca na su curpa, fractura na cara, ribchi y dede kibra. E otro cu a yud’e no a keda miho. El a haya fractura na su man y dede y mester a haya 35 cosi. Na momento cu el a bay purba defende F.S., e acusado a hinca su dos duimnan den su wowonan.  Aunke cu el a haya asina hopi sla, el a sinti cu e mester a yuda F.S., kende e acusado probablemente lo a mat’e si e no a interveni.�

Adiccion “pisa”

E problema di e acusado Jean-Pierre Croes ta su adiccion na droga y alcohol. Ora cu e ta bou influencia e ta perde control di su mes, segun e rapport di Psycholoog ta relata. E ta bira agresivo hopi lihe. E profesional aki ta haya cu e mester di tratamento pa su adiccion y di Respaldo pa su problemanan mental.�

Victima kier compensacion

E homber A.C. a resulta di ta un persona indocumenta na Aruba desde aña 2019 y a pidi asilo politico. Den e estado cu el a keda, e no por ni traha. El a keda cu problema na su brasa drechi y problema cu su bista. Ademas e no tin seguro medico.  El a pidi un compensacion di casi 50 mil florin.�

Esun cu a keda cu mas problema ta F.S., kende tambe tin problema cu bista. E ta den rolstoel caba, pasobra auto a dal e pero su situacion a bira pio, ya cu e no por baña ni bay w.c. su so.�

Bou influencia

Fiscal, durante su rekisitorio, a duna un resumen di loke a bin dilanti caba durante tratamento di e caso y tocante cu a haya e acusado sunu na momento di su detencion. Fiscal a indica cu mesora e polisnan a constata cu su comportacion tabata hopi straño y a sospecha cu e tabata influencia di un of otro substancia. E acusado a uza un biga y cuchiu pa maltrata e dos victimanan y mirando cu nan a keda, el a pidi corte pa declar’e culpabel di intento di asesinato. Pa esaki a pidi un castigo di shete aña.�

Menos castigo

Abogado mr. Bryson a concentra riba loke ta conclusion di rapport psicologico, esta cu e no ta completamente responsabel y mester di ayudo profesional. El a pidi corte pa sigui e conseho y impone un castigo menos di loke fiscal a pidi. Otro siman lo cera tratamento di e caso y pone fecha pa sentencia.





Source link

More in Caribe

A2Z ADMINISTRATION

Advertisement
Advertisement
Advertisement

AD

Trending

Advertisement
To Top