Otro director cu Raiz ta manda cas: Free Zone Aruba lo sigui sin Greg Peterson

Recientemente e Hunta di Comisarionan di Free Zone Aruba N.V. (FZA) a informa drs. Greg Peterson cu no ta desea di want’e mas den funcion di director di e entidad gubernamental. E tin casi 30 aña na cabes y en bes cu FZA bay padilanti, ta atras so e ta bayendo. Si den pasado, bou di e Hunta di Comisario anterior, e por a logra convence nan cu tur cos ta OK, aki si el a bin dal den muraya. 

Tabata algun luna pasa cu Minister mr. Geoffrey Wever a opta pa cambia e Hunta di Comisario cu ta represent’e den e compania. Aunke mas cu dos aña despues cu el a asumi e funcion. Tipo di cambionan asina normalmente ta haci mesora, pero el a opta pa tuma su tempo y kisas hasta evalua con e compania ta draai bou supervision di e Hunta di Comisario y bou mando di e director cu el a hereda. Den algun luna di tempo, tanto e Hunta di Comisario y e minister probablemente lo a conclui cu si wanta Greg Peterson ey, cu FZA hamas lo innova y pio progresa. 

Mal maneho financiero

Un di e leyendanan cu Greg Peterson ta bay laga atras riba su nomber ta e echo cu no a entrega cuentanan anual pa mas di dies aña largo. Den sector priva algo asina ta impordonabel y ta hasta castigabel pa ley. Tur aña mester depone e cuentanan anual na Camara di Comercio. Cu FZA siendo un entidad di gobierno ta opta pa no cumpli cu ley, ya ta demostra un falta di respet, un maneho no transparente, no integro y arogante. E lo a imagina cu nunca nada lo no pasa cu ne toch! 

Hopi problema interno

Den e compania mes e trahadonan ta keha cu ta dificil pa traha cu Greg Peterson. Su caracter y actitud ta diferente y ta mas bien daña e ambiente di trabou. Esey separa cu mayoria bes e no ta na oficina mes y niun hende sa su paradero. Consecuentemente varios ehecutivo den FZA a opta pa kita y busca un otro trabou, pa evita cu mester amarga nan bida tur dia.

Geoffrey Wever no ta Ursell Arends

Mester menciona cu Minister mr. Geoffrey Wever a demostra cu den tur e companianan cu ta resorta bou dje, el a nombra directornan capacita y cu un Hunta di Comisario mara na un “schetsprofiel”, consistiendo di hurista, accountant y profesionalnan den maneho di negoshi. Y cu e decision aki di yega na un acuerdo cu Greg Peterson pa e busca un forma pa ta exitoso den un otro compania y funcion, atrobe Wever a demostra, mescos cu e lema di Raiz “nos no ta nan”, cu e en todo caso no ta igual na Arends cu a hinca prima y famia den su ministerio. Wever aki ta subraya cu si pa un of otro motibo e director no ta funciona, e tin cu bay, aunke e por ta e “bestie” di e lider di partido. 

Raiz ta “bula nan cabes”

Den pasado Partido Democracia Real a saca un propaganda den campaña pa subraya e echo cu MEP tabata conoci pa persigui directornan politicamente y bula nan cabes. Pero cu e politica nobo di Raiz, nan no ta duna espacio tampoco na esnan nombra politicamente den funcion di director y cu ta carece di sea educacion of habilidad di liderazgo y\of maneho. Asina Raiz den Gabinete Wever-Croes II ya a core cu director na Serlimar, Parke Arikok, Post NV, Arubus NV y awo na Free Zone Aruba NV. 

Palanca di Raiz 

No ta un secreto cu Greg Peterson ta conserva un bunita amistad cu Ursell Arends y hopi ta catalog’e e consehero principal di e partido y di e minister. Esey a pone cu hopi lo a imagina cu e ta intocabel, por lo menos politicamente. Mayoria, si no ta tur su deseonan den ambito di naturalesa, a conta cu sosten di e minister pa ehecuta e cambionan manera cu Aruba Birdlife Conservation a pidi. 

Golden handshake? 

Te ainda no por bisa cu siguridad kico ta e “deal” entre e Hunta di Comisario y Greg Peterson. “Pero e no lo bira un golden handshake si”, asina un fuente hopi cerca di e negociacion a laga sa. Mas cu esey no kier a divulga, ni tampoco kico ta e motibonan cu a uza pa core cu Greg Peterson for di su funcion. A sigura si cu el a haya e carta den su man y e sa cu no ta desea pa sigui cu ne como director. Si e ta bay man bashi of cu algun luna di salario no ta conoci. Echo ta cu, a base di kehonan y awo cu e cuentanan anual riba mesa, lo no ta dificil pa convence un hues cu pa maneho exitoso Peterson lo no gana premio. Hurisprudencia den pasado a yega di menciona cu ora un compania no ta bay bon, e prome pa bay cas ta e director! Ta premira cu e ekipo negociado di Raiz lo uza e mesun retorica pa Arubus, Post y awo pa FZA tambe. 

A cambia Hunta di Comisario di FZA 

Dia 17 di mei 2023 Minister di Asuntonan Economico, Comunicacion y Desaroyo Sostenibel, mr. Geoffrey Wever, a introduci e constelacion nobo di e Raad van Commissarissen (RvC) di Free Zone Aruba (F.Z.A.) N.V. E ta consisti di mr. Patrick R.C. Brown, Stanley  P. Looman, Tariq H.L.E. Welhous, Gilmar Chejito Croes y Murial Cindy Clark. Conforme e statuto di  Free Zone Aruba (F.Z.A.)  e Raad van Commissarissen lo nombra e Presidente y Vice-Presidente internamente. Hunto nan a scoge Patrick Brown como presidente. El a tuma over for di abogado mr. Johan Sjiem Fat, cu a encabesa e Hunta di Comisarionan pa e ultimo añanan.

Atraso inaceptabel di cuentanan anual

Dia 10 juli 2024, Minister di Asuntonan Economico, Comunicacion y Desaroyo Sostenibel, mr. Geoffrey Wever, hunto cu director di FreeZone Aruba N.V. drs. Greg Peterson y Presidente di Raad van Commissarissen Patrick Brown, a aproba e jaarrekening di añanan 2020-2023 den un shareholder’s  meeting.

Aprobacion di cuentanan anual di FreeZone Aruba N.V. a tuma luga den dos fase. Na october 2022 despues di 10 aña, Minister Geoffrey Wever a aproba e jaarrekeningen di añanan 2012 – 2019. Cu aprobacion di e cuentanan anual den dos fase, fase 1 jaarrekening 2012 – 2019 den 2022 y fase 2 jaarrekening 2020 – 2023 den 2024 FreeZone Aruba N.V. como compania estatal awor ta up to date. 

“Como compania estatal bo mester tin bo jaarrekeningen up-to-date y entrega na tempo. Mi ta contento cu awo jaarrekeningen di FreeZone Aruba N.V. ta up to date. Mi ta kere den potencial di FreeZone Aruba N.V. como un actor importante den desaroyo di un economia diversifica y moderno na Aruba.”, segun Minister Geoffrey Wever.

Tocante Free Zone Aruba

Free Zone Aruba (FZA) ta un compania priva propiedad di Gobierno di Aruba. Su obhetivo ta pa promove Zona Liber Arubano, como tambe maneha y desaroya e propiedadnan y facilidadnan di zona liber.

Nan vision ta encera di ta e partner empresarial primordial pa companianan di confiansa, exitoso, operando internacionalmente y cu ta agrega balor na economia di Aruba, door di maneha un ambiente di zona liber atractivo y sigur na un manera profesional y dinamico.

E tres metanan principal ta:

·         Atrae inversion internacional solido

·         Promove y maneha facilidadnan atractivo di zona liber

·         Promove un Zona Liber di clase halto y conoci mundialmente

Compara cu tempo a cuminsa cu Free Zone Aruba na aña 1996, awendia e actividadnan ta masha limita y pa añanan caba e entradanan no ta yega pa cubri e gastonan, cu ta encera cu Gobierno di Aruba mester inyecta placa anualmente den e compania. 

A cambia ley di FZA

Na juli 2023 Parlamento di Aruba a aproba e cambio di Ley di Free Zone pa modernisa Free Zone y pa por introduci un lista di servicionan nobo door di empresanan estableci den Free Zone. 

Awor cu a modifica e ley, e siguiente paso ta pa formalisa un Landsbesluit houdende algemene maatregelen (LBham) den cual ta specifica cua servicionan un compania estableci den Free Zone por ofrece. E Landsbesluit cu ta contene e lista di servicionan nobo ya caba ta den preparacion y pronto lo wordo formalisa. E proceso pa formalisa e Landsbesluit ta un proceso largo cu pa varios luna ta den preparacion, mirando cu esaki mester wordo aproba tambe door di Organisation for Economic Cooperation and Development (“OECD”). Ta spera cu e oportunidadnan nobo ta capta interes di empresarionan y inversionistanan internacional y cu nan lo probecha di esaki y bin establece nan mes na Aruba”.

Tocante Greg Peterson

Drs. Gregory “Greg” Peterson a studia y a logra su diploma den sociologia na Universidad di Groningen na aña 1991. Manera cu el a caba di studia a opta pa bira un ambtenaar y desde e tempo ey, pa 33 aña largo, tabatin un solo doño di trabou, Gobierno di Aruba. Na aña 1991 el a drenta gobierno trahando na Departamento di Labor como hefe di e seccion di Planificacion di Mercado Laboral. Despues di apenas un aña, ya el a haya traslado y como tal na aña 1992 a bira director di Postkantoor. El a keda algo mas cu dos aña den e funcion y na aña 1995 a nombr’e “project manager” pa e proyecto di Free Zone Aruba. Un aña despues, na september 1996, despues cu el a diseña e proyecto, e mes a bira e prome y unico director di Free Zone Aruba, awo ya pa 28 aña caba. 

Tocante Aruba Birdlife Conservation

A funda Aruba Birdlife Conservation na aña 2010 como un organisacion di conservacion di naturalesa na Aruba. E ta un organisacion no-gubernamental, sin fin di lucro. Tin 236 sorto di parha registra na Aruba, di cual 3⁄4 ta migratorio. Aruba tin dos subespecie endemico, cu ta e Athene cunicularia arubensis (e shoco) y e Aratinga pertinax arubensis (e prikichi). 

Aruba Birdlife Conservation tin como meta pa proteha flora y fauna di Aruba y conserva y promove e habitat di parhanan. Desde su fundacion, e prome y unico presidente tabata Greg Peterson. E fundacion ta registra na su cas mes, Moko 111. E tin 14 aña na cabes di e fundacion.