Connect with us

Otro aña rotonde Palm Beach lo ta un realidad

Aruba

Otro aña rotonde Palm Beach lo ta un realidad


Den presupuesto di DOW 2021 ta keda menciona cu Gobierno lo sigui inverti den reconstruccion y mantencion di e infrastructura di nos camindanan. Durante tratamento di presupuesto di DOW Parlamentario Tromp-Lee a indica cu e ta super contento cu trabounan di mantencion a tuma luga riba e careteranan principal den Noord. Un necesidad cu e tin hopi aña ta bin ta indica. 

Actualmente Gobierno ta bezig cu e caminda di rotonde MFA Noord direccion Westpunt, un caminda principal importante cu sigur tabata rekeri di su mantencion. Tromp-Lee a enfatisa durante e reunion cu e ta spera cu e caminda te cu Westpunt keda finalisa (den fase) pronto. Otro camindanan principal den Noord cu tambe Parlamentario Tromp-Lee a pidi atencion pa nan ta esun den hotel area, di rotonde MFA pa crusada grandi di Palm Beach y e caminda di Frans Figaroa pa Superfood. Tur ta adernan principal den Noord. Segun Tromp-Lee ta esencial pa nos tene nos camindanan principal den bon condicion.

Banda di e camindanan principal aki Tromp-Lee a haci un peticion special na Minister pa loke ta trata e crusada grandi na Palm Beach. Un crusada cu a cera dia 7 di augustus di aña pasa y cu desde e momento ey a crea un situacion hopi peligroso. Esaki ta algo cu su persona mes ta experiencia diariamente y sigur e ta tuma nota cu accidente ta tuma lugar cu hopi frecuencia akinan. Pa es motibo aki e la manda preguntanan por scrito pa Minister di Husticia al respecto. Informacion ricibi for di Minister di Husticia ta indica cu desde 7 di augustus 2020 te cu 27 di september 2021 a tuma luga 81 accidente caminda tabatin 32 herido. Segun Tromp-Lee e cifranan aki so caba ta demostra cu nos mester percura pa un solucion pronto pa e crusada aki. 

Den e presupuesto 2021 di DOW ta keda menciona cu e crusada aki lo bira un rotonde y mirando cu esaki no a keda concretisa Tromp-Lee tabata di entrega un mocion alrespecto pero mirando cu e la tuma nota cu Gobierno a anuncia un destaho publico cu lo tuma luga dia 12 di november venidero, e no a haci esaki mas. Si Tromp-Lee a pidi splicacion di Gobierno di e Proyecto esta pa ki tempo ta bay cuminsa cu e construccion di e rotonde, cuanto e lo sali y pa ki tempo e lo keda cla. Gobierno a informa den sala di Parlamento cu e destaho lo tuma lugar na november 2021, construccion lo start na 2022 y pa mei 2022 e rotonde lo ta un realidad. E Proyecto aki lo costa 2,8 miyon florin cual suma ta presupuesta. Tromp-Lee ta finalisa bisando cu mirando e situacion peligroso na dicho crusada e ta contento cu e rotonde aki ta bay bin pronto y sigur e lo keda monitor e realisacion di dje.





Source link

Click to comment

Leave a Reply

Your email address will not be published. Required fields are marked *

More in Aruba

To Top