Connect with us

Ordo di minister-president: DRH a traha weekend pa corta salario di tur cu a protesta

Aruba

Ordo di minister-president: DRH a traha weekend pa corta salario di tur cu a protesta


Prome Minister mr/ Evelyn Wever-Croes den weekend no tabata na Aruba. Algun dia prome cu su biahe pa Merca a instrui Departamento di Recurso Humano (DRH) pa corta mesora den salario di tur esunnan cu e protesta recientemente. Dicho recorte lo ta den salario di december ainda, ora cu empleadonan publico tin mas gasto. Di e forma aki Gobierno ta para riba cu nan ta para pa “no work no pay”. Di otro banda, den pasado, ningun gobierno a corta salario di trahado cu a busca nan derecho den un accion di protesta.

For di momento cu a tuma luga protestanan di un of otro departamento of maestronan di scol, mesora a bay carta di DPS pa cabesante di cada scol. E carta ta instrui cabesantenan pa manda e lista di tur esunnan cu a bay sea reunion na SIMAR of a protesta.

Mesun cos a sosode na e hefenan di e departamentonan di gobierno. E motibo di e carta y instruccion tabata pa haya lista di tur ambtenaar cu a protesta, pa mesora e luna aki corta den e salario di december e oranan cu a protesta. Gobierno a instrui pa desconta un of mas ora cu tabata ausente na pia di trabou.

Den weekend e lista di e trahadonan tabatey y empleadonan di DRH mester a traha overtime pa keda cla pa hinca tur e nombernan den e sistema pa reduci esaki mesora di nan salario di december.

Logicamente DRH mester sigui instruccion di su minister, cu ta Prome Minister mr. Evelyn Wever-Croes. E empleadonan a expresa desapunto cu nan mes mester corta den salario di coleganan den gobierno, pero esaki no ta den nan man, sino “ordo di ariba”. Esaki ta un forma di spanta e empleado publico buscando su derecho contra e recorte di 12.6%.

E un of mas ora di protesta ta casi nada di loke gobierno a ranca pa mas cu un aña cu e 12.6%. Pesey sindicatonan y nan miembronan tampoco lo sucumbi cu e actuacion di DRH riba instruccion di gobierno. Empleadonan publico y sindicatonan ta decisivo contra gobierno riba e recorte. Gobierno a bisa publicamente cu e recorte tabata pa FASE. Awe a kita FASE y esey segun e empleadonan cu a entrega, tambe ta motibo pa elimina e 12.6%.

Siman nobo lo habri cu hopi turbulencia pa gobernacion, basa riba e mesun engaño cometi dor di ministernan contra e trahadonan publico. Aki ta caminda cu ambtenaarnan lo laga gobierno sa cu nan por ta simpatisa cu cualkier partido politico, pero esun cu hinca man den nan cartera, lo paga e prijs politico. Pasobra na final, votadonan mes ta pone y baha un gobierno!





Source link

Click to comment

Leave a Reply

Your email address will not be published.

More in Aruba

To Top