Connect with us

Opinion:Vision di Juancho Irausquin, fundador di nos turismo, ainda ta salba nos pais

Aruba

Opinion:Vision di Juancho Irausquin, fundador di nos turismo, ainda ta salba nos pais


Posted on 06/21/2022 11:10 am AST | Updated on 06/21/2022 12:35 pm AST

Scirbi pa : Stichting Juancho Irausquin

Juan Enrique (Juancho) Irausquin, a nace riba 3 di December 1904. Juancho tabata un persona cu  tabatin e vision pa desaroya y salbaguardia Aruba. Vision pasobra na e momento cu Juancho a bay den politica Aruba no tabata un isla cu tabata conoce turismo. 

E tempo ey e rafinaderia tabata e único pilar Juancho tabata desea un otro entrada pa Aruba, pa Aruba no depende di Lago cu tabata e pilar di entrada principal pa Aruba. Juancho tabata ker un segundo pilar di entrada por se acaso Lago lo sera un dia. Hopi hende e tempo ey a bisa cu Lago lo nunca sera. Pero nos tur sa cu loke Juancho a premira a pasa tambe na Aruba differente biaha y awo e rafinaderia ta sera.

Juancho tabatin un vision di un futuro di Aruba, cu su politiconan contricante no por a imagina. Juancho tabata kere den su pais y e potencial di turismo pa Aruba. E di nos ta bay bira un “Miami chikito”. Otro politico tabata bise cu esei no ta possibel. Ta ken lo ker bin Aruba? “Ta kabrito ta bay keda den e hotel”. Pero Juancho su fe den su vision y den su pueblo amabel tabata hopi grandi. Su experiencia como director di banco a yude pa traha un plan pa su vision bira realidad. Nos tur ta mira con turismo a bira e curazon di nos economia. Cu e entrada di turismo Juancho Irausquin un trese un era nobo pa Aruba. E fundeshi economico di nos pais a wordu poni dor di Juancho Irausquin. 

Den tempo di Juancho, 1950, no tabatin nada na e banda Noord di nos isla na unda awo tur nos hotelnan ta. Juancho a sigi cu su plan pa traha e prome hotel. El a para den mondi cu kabrito, wak nos playanan blanco y a pone imagina nos prome hotel grandi cu yen di turista. E la traha e caminda, tubo di awa y coriente, traha nos hotel, cu tabata Aruba Caribbean Hotel cu a habri na aña 1959. Un vision cu a bira realidad. Ainda nos por admira e hotel cu awo ta Hilton Hotel. 

Juancho Irausquin a pone nomber di Aruba ariba mapa Internacional y a habri caminda pa miles y miles Arubiano por labora den sector di Turismo. Juancho Irausquin ta e fundador di Turismo, e persona cu tabatin e vision pa Aruba. E vision di Juancho Irausquin a trese desaroyo y prosperidad pa Aruba. Su plan pa garantisa entrada pa Aruba a traha na momento cu Lago di berdad a sera y asina a salbaguardia Aruba hasta despues cu e no tabatey mas. Awor Turismo ta nos pilar di entrada mas grandi di Aruba cu mas cu 1.5 million turista. Loke Aruba ta awe ta danki na e vision di Juancho Irausquin. Un Arubiano cu un vision grandi a demonstra cu un persona por hasi un diferencia. Te awe nos ta biba y gosa di e vision di Juancho Irausquin. Un heroe di nos pais cu a bay laga nos riba 20 juni 1962. E merece di wordo recorda.

 





Source link

More in Aruba

To Top