Connect with us

Noticia policial Boneiro: 28 di juni te cu 8 di juli 2024

Caribe

Noticia policial Boneiro: 28 di juni te cu 8 di juli 2024


Boneiro: Notisia di polis di djabièrnè 28 di yüni te ku djaluna 8 di yüli 2024

Pikòp ta dal den kas
Riba djadumingu 7 di yüli, alrededor di 9.50 or di anochi, ‘meldkamer’ sentral a risibí notifikashon tokante un vehíkulo ku a bai dal den un kas riba Kaya Nikiboko Sùit. Na yegada di e patruya, e agentenan a topa ku un pikòp. E shofùr a deklará ku su stürwil a bira duru, pa kual motibu el a bai dal den e kas. Konforme e maneho ‘botsen is blazen’, a hasi un tèst di supla ku e shofùr, ku a resultá negativo. Ambulans a transportá e pasahero pa hòspital pa tratamentu médiko. Tur dokumento di e shofùr tabata na òrdu.

Aksidente Kaminda Turístiko
Alrededor di 5.30 or di atardi riba djadumingu 7 di yüli, un aksidente entre un pikop i un outo a tuma lugá riba Kaminda Turístiko. E shofùr di e pikòp a deklará ku e tabata kore den direkshon di Playa i el a mira un outo aserkando. El a para kantu di kaminda di manera ku e outo por a pasa den su banda. Diripiente el a tende un zonido duru i a ripará ku e outo a dal parti patras na banda robes di su vehíkulo. Konforme e maneho ‘botsen is blazen’, a hasi un tèst di supla ku ámbos shofùr. E resultado serka ámbos tabata negativo. E shofùr di e outo a resultá levemente heridá i personal di ambulans a kontrol’é na e sitio mes. Sí el a haña un but pa manehá sin un reibeweis bálido i seguro.

Ladronisia for di vehíkulo
Riba djadumingu 7 di yüli a drenta keho di ladronisia for di un outo ku tabata stashoná pafó di un tereno di un establesimentu di hóreka na Kaminda di Lac. Entre 12.30 or di mardugá i 2.30 or di mardugá, deskonosínan a bai ku algun artíkulo for di e outo. Ta trata di entre otro un kaha koló krèm ku un estuche koló pretu, ku den dje un brel di bista di e marka Gazal ku por usa tambe komo brel di solo, un ‘USB-stick’ koló kòrá ku shinishi di 16 GB i un ‘Reader’ koló pretu. Ta investigando e kaso.

Detenshonnan pa manehá bou di influensia
Riba djasabra 6 di yüli, alrededor di 8.25 or di anochi, a detené un hòmber di inisial R.A.H. di 71 aña di edat riba Kaya Monseigneur Nieuwindt pa manehá bou di influensia di alkohòl. E sospechoso tabata enbolbí den un aksidente entre dos outo riba e kaya menshoná. Konforme e maneho ‘botsen is blazen’, a hasi un tèst di supla ku e sospechoso. Debí na e resultado di esaki a detené i hib’é warda di polis pa un análisis di rosea. A konsekuensia di e resultado di esaki a konfiská reibeweis di e sospechoso.

Riba djárason 3 di yüli, alrededor di 1.15 or di mardugá, ‘meldkamer’ sentral a risibí notifikashon tokante un aksidente ku a tuma lugá riba Kaminda Yato Bako. E persona ku a mèldu a tende un zonido fuerte i a mira e outo enbolbí sigui kore bai den direkshon di Kaya Macario (Cai) Sint Jago. Na momentu ku e patruya a bai buska e outo menshoná, nan a topa ku esaki moviendo riba Kaya Macario (Cai) Sint Jago i ku flèt tayer. Polis a duna e shofùr señal pa para, pero el a neglishá esaki i a sigui kore. Mas despues el a kore drenta un kaminda di tera i a para na un kas. E vehíkulo tabatin daño na e parti dilanti, bou di kua tambe e winshil tabata kibrá. A duna e shofùr òrdu pa mustra un reibeweis bálido i prueba di seguro. El a kumpli ku e petishon, pero su seguro a kaduká. Durante di e kòntròl por a konstatá ku e shofùr tabata mustra diferente karakterístika di un persona ku ta bou di influensia di alkohòl. Konforme e maneho ‘botsen is blazen’, e agentenan a dun’é òrdu pa hasi un tèst di supla pero el a nenga di hasi esaki. A detené e sospechoso, un hòmber di inisial A.M.M. di 40 aña di edat i a hib’é warda di polis pa un análisis di rosea. A konsekuensia di e resultado di esaki a konfiská su reibeweis.

Den oranan di mardugá riba djadumingu 30 di yüni, a detené dos shofùr pa manehá bou di influensia di alkohòl. Ta trata di un hòmber di inisial J.d.l.C. di 36 aña di edat i un hòmber di inisial R.F.S.B. di 41 aña di edat ku tabata enbolbí den un aksidente riba Hanchi Amboina. Na yegada di e patruya ámbos shofùr tabata mustra diferente karakterístika di un persona ku ta bou di influensia di alkohòl. Konforme e maneho ‘botsen is blazen’, a hasi un tèst di supla ku e sospechoso di inisial J.d.l.C. i a resultá ku el a konsumí mas alkohòl ku ta permití ora ta manehá un vehíkulo. A konsekuensia di e resultado di un análisis di rosea ku a hasi kuné na warda di polis, a konfiská su reibeweis. E otro sospechoso di inisial R.F.S.B. a nenga hasi un tèst di supla. A hib’é tambe warda di polis pa un análisis di rosea i a resultá ku el a konsumí mas alkohòl ku ta permití ora ta manehá un vehíkulo. Despues di kòntròl mas aleu a resultá ku e no tabata disponé di un reibeweis bálido ni un seguro bálido. Pa esaki a dun’é un but i a hiba su vehíkulo warda di polis.

Riba djasabra 29 di yüni, alrededor di 8.20 or di anochi, a detené un hòmber di inisial E.A.A.L. di 66 aña di edat riba Kaya Industria pa manehá bou di influensia di alkohòl. E sospechoso tabata enbolbí den un aksidente entre dos vehíkulo. Durante kòntròl por a konstatá ku e sospechoso tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta permití ora ta manehá un vehíkulo. A detené e sospechoso i hib’é warda di polis pa un análisis di rosea. A konsekuensia di e resultado di esaki, a konfiská su reibeweis.

Detenshon pa maltrato, destrukshon i ladronisia
Riba djabièrnè 5 di yüli, alrededor di 1.25 or di mèrdia, a detené un hòmber di inisial J.F.A.C. di 23 aña di edat na warda di polis pa maltrato, destrukshon i ladronisia. Ta investigando e kaso.

Aksidente Kaya Korona
Riba djabièrnè 5 di yüli, alrededor di 8.55 or di mainta, ‘meldkamer’ sentral a risibí notifikashon tokante un aksidente entre dos vehíkulo riba Kaya Korona. Na yegada di e patruya a topa ku un pikòp i un outo ku a dal den otro. Ambos shofùr a resultá heridá i tabata keha di doló. E shofùr di e outo a deklará ku e tabata kore muchu duru, pa kual motibu el a pèrdè kòntròl i bai dal den e pikòp ku tabata bini for di direkshon kontrali. Pa motibu ku un di e shofùrnan tabatin mas leshon ku e otro, konforme e maneho ‘botsen is blazen’, a hasi un tèst di supla ku solamente un di shofùrnan. E resultado di esaki tabata negativo. Ambulans a transportá ámbos shofùr pa hòspital pa tratamentu médiko.

Kabes di buriku klabá na palu di lus
Riba djabièrnè 5 di yüli, alrededor di 10.40 or di mainta, ‘meldkamer’ sentral a risibí notifikashon tokante un kabes di buriku klabá na un palu di lus, riba kaminda di Rincon, na Kaminda Tras di Montaña na altura di e krusada di Kaminda Seru Largu. Debí na e notifikashon aki, polis a bai inmediatamente na e sitio pa investigá e situashon. Na e momentu ei no a topa ku e sobrá kurpa di e buriku. Lamentablemente, e agentenan polisial no a topa ku niun indikashon òf evidensia relevante ku por kondusí na mas akshon. No opstante esaki, a registrá e situashon den e sistema digital di polis. A dokumentá e insidente di forma detayá i tur informashon ku por ta relevante pa e kaso aki lo ser agregá na e archivo eksistente.
Mas despues riba e mesun dia, ‘meldkamer’ sentral a haña informashon ku a topa ku e sobrá di e kurpa di e buriku den un kunuku den serkania. Polis ta keda alerta pa kada informashon nobo i/òf pistanan ku por kondusí na e malechor. Nos ta sigui monitoriá e situashon i ta keda pendiente pa kualkier pistanan nobo ku por keda investigá.
Polis ta pidi kualkier persona ku por a mira algu, a tende algu òf tin informashon relevante pa e investigashon, pa tuma kontakto ku polis na 715-8000 òf via di e liña di tep anónimo 9310.

Outo ta dal peaton
Riba djaweps 4 di yüli, alrededor 4.30 or di atardi, ‘meldkamer’ sentral a risibí notifikashon tokante un aksidente riba Kaya Amsterdam, na kua e persona ku a mèldu tabata pidi asistensia di ambulans ku urgensia. Ta trata di un aksidente entre un outo i un peaton. Na yegada di e patruya, e personal di ambulans ya kaba tabata trata e víktima. E shofùr di e outo a deklará ku e tabata kore riba Kaya Amsterdam direkshon di rotonde di Hato en na dado momentu el a mira un persona tabata kana kantu di kaminda, patras di un bòrchi di propaganda. Diripiente el a mira e persona a krusa kaya. El a purba evitá un aksidente, pero no opstante esaki el a dal e peaton, pa kual motibu e víktima a kai. Konforme e maneho ‘botsen is blazen’, a hasi un tèst di supla ku e shofùr ku a resultá negativo. Ambulans a transportá e víktima pa hòspital pa tratamentu médiko.

Detenshonnan
Riba djárason 3 di yüli, alrededor di 6.50 or di anochi, a detené un dama di inisial L.d.B. di 36 aña di edat den Kaya Grandi pa manehá bou di influensia di alkohòl i pa no duna oido òrdu di polis. A detene su pasahero tambe, un dama di inisial R.S. di 32 aña di edat pa insulto di un amtenar i pa no sigui òrdu di polis.

Un agente polisial na sivil ku tabata presente na un establesimentu di hóreka den Kaya Grandi, a konstatá ku tabatin un grupo di persona, ku no por a para riba nan pianan, a kana bai na nan vehíkulo. Un di nan a drenta e vehíkulo komo shofùr mientras e otronan a subi e vehikulo komo pasahero. Despues, e agente a tende e motor res i a mira e pikòp a kuminsá kore, pero e motor a paga. Despues di a bolbe sende e motor, e mésun kos a bolbe sosodé. Debí na e opservashonnan aki, e agente a kana bai na e vehíkulo i a papia ku e shofùr, ku su aliento tabata hole alkohòl.

E agente polisial a legimatisá su mes ku su karnèt di polis i a partisipá na e shofùr ku tabata opvio ku e no ta den estado pa por manehá e pikòp. Na e momentu ei un di e pasaheronan a kuminsá insultá e agente. E shofùr a trata na kore bai pero e agente a tené. El a nenga duna oido na òrdu di e agente. E pasahero tambe a sigui insultá e agente.

Na yegada di e patruya, a detené tantu e shofùr i e pasahero i a hibanan warda di polis. A konsekuensia di e resultado di un análisis di rosea, a konfiská reibeweis di e shofùr. Durante transporte di e pasahero pa prizòn (JICN), el a skupi un di e agentenan. Ta investigando e kaso mas aleu.

Kuerpo Polisial Hulanda Karibense (KPCN) ta enfatisá ku kualkier forma di agreshon ferbal òf físiko kontra agentenan, no ta tolerabel i ta kontestá esakinan ku posibel medidanan estríkto. E komportashon aki no ta solamente kastigabel segun lei, pero ta mina tambe e seguridat i e órden hurídiko ku nos komo polis tin ku mantené.





Source link

More in Caribe

A2Z ADMINISTRATION

AD

To Top