Connect with us

No tin motibo mas pa need’e cera: Kevin Wever a bay cas

Aruba

No tin motibo mas pa need’e cera: Kevin Wever a bay cas


Awe diasabra recherchenan encarga cu investigacion di e caso di pelea y destruccion den Gusto Nightclub y Azia Restaurant a sigui cu nan interogacionnan. Despues di a caba di interoga Christopher Williams, a lag’e bay. Un rato despues a tuma e mesun determination pa Kevin Wever, yiu di minister-president. E tambe por a bay cas despues di su interogacion. E ultimo aki a pasa di victima den e caso, pa sospechoso. Parce cu e video di siguridad den e restaurant no tabata na fabor di yiu di e mandatario.

Mester menciona cu, un dia despues di e susedido, cu Kevin Wever a bay hunto cu su tata na ward’i polis na Nood, pa eynan entrega un keho contra e rumannan Williams. A bisa cu nan a dal’e di trincion. Un rato despues Williams tambe a entrega keho contra Wever, cu lo a insult’e y scupie den e luga. E caso a manera tarda basta y no por kita afo e presion politico cu a bin cu ne pasobra mama di Kevin Wever a hasta ataca oponentenan politico durante pleno reunion di parlamento, uzando e caso aki. Pues un simpel bringamento a bira un topico politico den parlamento y cu ne a bin a presion publico pa husticia actua pa caba.

Na aeropuerto trahadonan ta pendiente

Na Aruba Airport Authority awo empleadonan ta masha pendiente riba ki accion gerencia lo tuma. Den pasado, ora otro coleganan haya nan mes den problema cu husticia, cu detene nan of algo, cu mesora ta kita nan badge y suspende nan di trabou. Den e caso aki e asunto ta mas serio, pasobra ta un miembro di siguridad di aeropuerto, cu awo tin acusacion formal contra dje di Ministerio Publico pa bringa, herida otro hende y comete destruccion den un luga publico. E empleadonan kier mira awo ki paso lo tuma pasoba si dun’e un trato preferencial, e lo mester bira un normal nobo pa tur otro empleado tambe.

Weekend a habri cu ordo di detencion

Fiscal mr. Rianne Wilderman a saca un ordo diabierna mainta pa detene Kevin Wever como sospechoso den e caso di bringamento y destruccion na Gusto Nightclub y Azia Restaurant. Kevin tabata na trabou, pero pa evita cu lo deten’e na pia di trabou, a opta pa mand’e cas y p’e mes bay entrega su mes. El a haci esey tambe, hunto cu su abogado. Na momento di su yegada na ward’i polis na Noord, a deten’e y bis’e suderechonan y un rato despues a cuminsa interog’e y mustr’e materials visible pa e mes mia y corda kico el a haci e dia. Atardi a bis’e cu fiscal a ordena su encarcelacion pendiente e investigacion den su contra.

Hopi atencion pa e caso

E caso aki a haya mas atencion cu regular pasobra ta trata aki di yiu di e lider politico Michael Williams di Partido Pueblo Prome y yiu di e mandatario Evelyn Wever-Croes, lider di MEP y alabes minister-president. Ambos ta contrincante pisa di otro den area politico y ta parce cu e yiunan a opta pa sigui cu mesun ehempel aki, pero riba caya y cu masha agresividad. No solamente na Aruba, sino te na Hulanda y otro paisnan den Reino Hulandes a duna atencion na e noticia aki, cu yiu di prome minister di nos pais ta cera pa bringamento riba caya.

E famoso pelea mes

Tabata diadomingo dia 14 di november ultimo cu tabatin un pelea den baño di Gusto Nightclub entre Nigel Williams y Kevin Wever. Esun ta acusa e otro di a coba su mama y scupie. Siguridad di dicho membership a saca e bringadonan porta ‘fo mesora. Pero en bes di bay cas, a opta pa e ora bay come den Azia Restaurant y no a dura mucho cu e gang a topa cu otro atrobe. Ey a bolbe tira sla y den e proceso a kibra boter tira den e luga. Den e proceso a corta chef di e restaurant inocentemente, te cu ambulance mester a presenta na e sitio y despues transporta e empleado pa hospital pa ricibi tratamento medico avansa.

Mas hende a cay cera

Mester menciona cu luna pasa a detene e sua di Kevin Wever, esta Yowalfre Torres-Mendez, cu ta pareha di e yiu muhe di minister-president, Claudine Wever, kende tambe tabata cu Kevin durante e pelea. El a keda cera den cel na ward’i polis for di diabierna te cu diaranson. Den e proceso a detene Nigel Williams y tin un amigo di dje cu tambe a bay cera na inicio, sospecha pa tabata envolvi e dia ey tambe den sea e pelea of destruccion.

Presion politico

Mester menciona cu for di recherchenan encarga cu e caso a menciona cu nan a experencia masha hopi presion for di Ministerio Publico pa nan a detene Nigel Williams. Tabatin un hefe di recherche cu a nenga di cumpli cu e ordo aki y a hasta bay cu vakantie memey di e caso, como malcontento pa e forma con fiscal tabata atende cu e caso specifico aki. A logra convence e di dos den rango, pa e tuma e caso over y bay over na detencion. Pero e tambe a para riba cu si detene Williams, mester detene Wever tambe, cu aparentemente t’esun cu a tira boter y corta e trahado di Azia Restaurant.

Ta parce un “present”

Conocedonan di nos codigo di procedimento penal ta cuestiona henter e accion aki di Ministerio Publico, cu mas bien ta sucumbi pa presion di publico y di rednan social. Pa bay over na detencion, cu tanto atencion na algun hoben cu no a comporta nan mes corecto den publico y despues laga nan bay bek su mañan, ta keda e pregunta si no por a haci tur esaki diabierna den dia y evita e detencion. Separa di ta participa na e present aki, ta cuestiona cuanto e caso aki ta costando pueblo, pa un simpel pelea entre yiunan di politiconan. No por kita for di e percepcion cu e prioridad di Ministerio Publico ta robes aki pasobra tanto caso mas importante ta para, pa dedica asina hopi tempo, recurso y placa na un caso asina.





Source link

Click to comment

Leave a Reply

Your email address will not be published. Required fields are marked *

More in Aruba

To Top