Nan ta disgusta: Contraloria general a traha rapport sin nunca papia cu Canadian Bank Note

Cu asombro Canadian Bank Note (CBN) cu ta maneha e loteria di Aruba, a tuma nota di un rapport traha door di Contraloria General di Aruba. Ta trata di e rapport titula “Op afstand, maar toch dichtbij”. Un estudio haci riba seis empresa of stichting di gobierno. Entre nan tin Fundacion Lotto pa Deporte Aruba. A expresa nan preocupacion pa hopi cos cu ta den e seccion cu ta relata na FLPD y cu no ta corecto. Y ta lamenta esaki pasobra aunke cu ARA a laga e ministernan concerni cu cada un di e empresanan reacciona, CBN no a wordo acerca pa duna su punto di bista riba e preocupacionnan di ARA.

E ariba menciona ta motibo cu CBN(A) a manda un carta hopi pisa pa ARA den cual nan ta expresa nan disgusto. Y alabes ta pidi pa agrega tur nan splicacion den e rapport ya menciona.

Segun por a compronde, no ta ni e mandatario cu a duna informacion na e institucion di ARA pero algun coordinado di dje. Y esaki ta keda refleha den contenido di e rapport, cu aspectonan cu no ta cuadra cu otro.  E preocupacion di CBN, segun por a compronde, ta cu e rapport ta acusa e operador di e loteria di Aruba di un falta di transparencia.  “Si boso a acerca nos, cu gusto nos lo a provee boso mas claridad hunto cu nos cliente FLPD”.

Algo cu sigur nan no ta di acuerdo cu ne ta ora cu den e rapport di ARA ta para cu Gobierno di Aruba y FLPD a perde bista y control den e entradanan di loteria, y distribuimento di esaki. Y cu esaki ta causa principalmente door di e Lotteries Managent Service Agreement (LMSA), entre CBN, CBNA y FLPD.

Pa cuminsa, FLPD tin e licencia y nan ta responsabel pa sigura cu CBNA ta maneha e loteria di acuerdo cu ley, e contract y loke ta standard di e industria. Y tambe percura pa mantene Gobierno di Aruba informa di e asuntonan di loteria ta responsabilidad di FLPD.

Den e Statuutnan ta poni bon cla cuanto bes pa aña mester reuni y na unda, y ki informacion ta suministra den e diferente encuentronan. “Nos a mantene nos mes na e cantidad di reunion, hasta den e temporada di pandemia,” ta skirbi  den e carta. Y a agrega cu “semper a mantene un bon linea di comunicacion habri cu FLPD y, ora cu ta posibel, cu Gobierno di Aruba”. Incluso  hasta ora cu ta bay lansa un producto nobo riba mercado, ta laga FLPD revisa esaki pa mira si e ta cumpli cu e Ley di Loteria.

Tambe ta duna bista den e operacion di e loteria y finansa  den e relatonan anual cu ta comparti cu FLPD.

Di otro banda, CBNA no tabata consciente cu durante un tempo FLPD y Gobierno di Aruba no tabata riba e mesun linea. Si nan a haya sa despues  cu esaki a conduci na un falta di comunicacion entre e fundacion y gobierno como tambe casonan legal y debate publico. Nan ta haya cu ARA ta bay demasiado leu pa bisa cu esaki tin di haber cu LMSA.  Y loke ta hala atencion di tur hende ta caminda den e carta na ARA ta menciona cu: “Mester tene na cuenta cu mientras cu e comunicacion entre FLPD y gobierno a sufri, e loteria por a sigui den e periodo ey debi cu e operacion tabata den mannan di un tercer partido di profesionalnan cu ta neutral politicamente,  cu pa gran parti, a isola e negoshi for di e debate publico.

Tambe nan ta bisa ta totalmente falso cu ni Gobierno di Aruba ni FLPD no tin bista con CBNA ta distribui e placa di loteria. Segun contracto, nan ta responsabel pa esaki.  E informe den e rapport di ARA ta crea e percepcion inhusto  cu “nos operacion ta frustra transparencia mientras cu transparencia ta un caracteristica cu nos compania ta orguyoso di dje”.

CBNA no tin ningun control riba distribuimento di entradanan di loteria, solamente pa reparticion di e premionan, den nomber di FLPD, haci pago di prestamo, paga comision n’e bendedonan, paga gastonan di operacion y paga e suma di placa na SSA pa un bon causa den nomber di FLPD. Eseynan ta tur e obligacionnan cu FLPD tin pa cumpli cu nan, E forma con e resto di placa di loteria ta wordo uza of gasta ta keda na FLPD dicidi riba esaki, Pues pa e motibo ey nan ta bis cu e conclusion cu FLPD no tin control riba con e entradanan di e loteria ta wordo distribui no ta corecto. E entrada netto FLPD por gast’e manera nan ta haya ta bon,  mientras cu e tin un suma fiho caba cu ta bay pa SSA.

A cuestiona e pensamento of conclusion di ARA unda cu ta bisa cu deporte di Aruba no ta wordo suficiente beneficia debi na e acuerdonan existente entre FLPD y CBNA.  Ta bon pa e hendenan compronde cu tin un suma di placa grandi ta bay pa CBNA y cu ta  bay pa gastonan di operacion, no di man pero di FLPD. Cualkier cambio cu por bini, e suma aki lo no bira menos. E ta un post di gastonan cu mester cumpli cu ne, si ta FLPD ta pag’e of CBNA of otro instancia.

Di otro banda, nan ta haya cu e rapport no a tene cuenta cu otro aspectonan cu ta limita e contribucion di FLPD na deporte. Ta menciona entre otro e aumento di BBO, Pago halto di prestamo, un competencia inhusto  den e mercado di loteria, of gastonan di operacion innecesariamente halto di FLPD bou di e maneho anterior.

CBNA tin contracto cu dies entidad di loteria den Centro America, Caribe y Sur America. Tur ta maneha di forma similar y cu meta similar, bou di supervision di un entidad gubernamental.  Loke ta haci e tipo di acuerdonan un exito ta cu CBNA ta un partido cu un acercamento politicamente neutral. P’esey nan ta pone hopi enfasis cu e acuerdo cu FLPD no ta desbentahoso pa e fundacion.

CONCLUSION

CBNA ta lamenta cu nan compania ta wordo pinta preto, poni den luz negativo, Sin ningun splicacion, e informe den e rapport ta yega n’e conclusion eroneo cu CBNA:

·         A trata FLPD inhusto

·         Ta haya ganashinan extraordinario causando cu FLPD no por financia bon causanan;

·         Ta nenga tanto FLPD y Gobierno di Aruba di mira of haya informacion encuanto e operacion comercial;

·         Faya pa tene cuenta cu e metanan di FLPD den e metanan comercial di CBNA;

·         Faya pa implementa procesonan di benta di ticket di loteria y procesonan en general cu por hiba na maximalisa e entradanan di loteria pa e bon causanan.

Pa finalisa nan ta bisa cu e rapport publico, hunto cu e peso cu esaki ta bini cu ne, ya cu e ta di un institucion reconoci, y “ta laga nos compania vulnerabel pa cu actual y futuro clientenan cu un impresion negativo di e forma con nos ta haci negoshi”.

Ta hopi mas tin poni den e carta, cu un copia ta compaña e articulo aki. Y cu ta firma door di e vice-presidente di Operacion pa Caribe y Sur America di Canadian Bank Note Company Limited.