Connect with us

Misha Raymond na MEP: Nos kier transparencia!

Aruba

Misha Raymond na MEP: Nos kier transparencia!


Ya ta varios dia caba cu tin un impasse den coalicion pa loke ta trata e firmamento di contract di WEB cu Eagle LNG. Despues di tabata varios dia na Hulanda, parlamentario Misha Raymond a duna su declaracion na momento di su yegada.

Misha Raymond, a bisa cu na e momentonan aki RAIZ ta boga pa transparencia. Nan kier haya informacion y tambe nan kier sa con e proceso aki a bay. E ta importante pa por tin ‘good governance’. Raymond ta compronde e reaccionnan di diferente banda como tambe di comunidad.

Ainda e partido lo mester sinta y reuni p’asina por tin un idea riba kico tur ta desaroyando den partido mes. E mas importante ta pa sa unda nan kier bay. Raymond, a menciona di ta orguyoso di su colega den fraccion esta Raymond Kamperveen mirando cu el a asumi e trabou den ausencia di lidernan di fraccion y Presidente di Parlamento. “E tabata bon pa wak con el a para riba su pia y vocifera cierto cosnan”, Raymond a agrega. RAIZ como tambe demas fraccion kier claridad y transparencia. Nan ta pidiendo informacion.

REUNION

Den fin di siman Presidente di Parlamento, cu actualmente ta den exterior, a yama un ‘Openbare Bijeenkomst’ siendo cu oposicion a pidi un reunion publico. Sinembargo un dia despues e vice-presidente di parlamento a bari su reunion for di mesa y cambia esaki pa un ‘Openbare Vergadering’, pues den cuestion di un rato tur cos a cambia. Raymond a splica cu tin un reglament van orde, tin cierto manera con pa haci e cosnan. Awo cu Presidente di Parlamento Edgard Vrolijk no ta na Aruba, ta Raymond Kamperveen mes tin cu yama reunion y planea locual tin cu sigui. Pues Kamperveen a actua segun e ‘reglament van orde’. RAIZ ta para tras di e desicion di Raymond Kamperveen.

Pa loke ta trata e preguntanan cu su colega Raymond Kamperveen a manda pa minister Glenbert Croes dia 5 di november, el a cuestiona e maneho di nombramento. Esaki ta e transparencia cu RAIZ ta para p’e den parlamento. Segun Misha, no por bisa di haci e conan diferente y no hacie. E ta di pensamento cu mester ta transparente pa asina por haci pregunta, pues si no tin transparencia no por haci e preguntanan cu ta necesario.

“Cu nos ta pone pia abou, boga pa transparencia y pidi mas informacion ningun hende por tuma nos na malo”, Raymond a expresa. E no sa kico tur por spera dialuna, locual e sa si ta cu nan lo ta prepara. Por spera locual semper a mira di RAIZ, boga pa principio. E desaroyo ta hopi ‘cayente’, e miho cos ta pa keda den comunicacion, mustra transparencia y mantene nan mes cu nan principio den mente.

Por ultimo, Misha Raymond a bisa di ta contento di ta bek. E ta di pensamento cu den tur e turbulencia mester busca un manera pa yega na un ‘smooth sailing’.

MISHA RAYMOND

Raymicheline ‘Misha’ Raymond tin 36 aña y ta huramenta un di e dos parlamentarionan nobo di RAIZ. Raymond tin un carera como psicologo y ta traha cu mucha y hoben. El a studia na Leiden y a haci su master na Clinical Neuropsycology di mucha. Despues cu el a termina cu su estudio, e ta trahando na Respaldo como psicologo. E ta mira mucha traumatisa, tambe famia cu ta pasa den duro of den dificultad. Un otro cos cu e ta haci den su carera como psicologo, ta atende cu problema psikiatrico. Un di su hobbynan ta makeup pero ta gusta lesa, cana y ta pafo. E ta gusta pasa tempo cu tanto su famia como amistad. E ta un persona cu ta “people person”, esta gusta ta rond di hende. Aunke e ta traha cu mucha, den su tempo liber ta pasa hopi cu su sobrinanan.

Durante eleccion 2021, Misha Raymond ricibi confiansa di 693 votado.





Source link

Click to comment

Leave a Reply

Your email address will not be published. Required fields are marked *

More in Aruba

To Top