Minister Xiomara Maduro: Gobierno ta revisa sistema di subsidio pa mehora su eficiencia y efectividad

E reciente carta di CFT a genera atencion cerca varios Ministerio, destacando e tardamento den e proceso di contestacion y e necesidad di un esfuerso adicional pa mehora e transparencia financiero na Aruba. Durante un conferencia di prensa, e ministerio demisionario di finansa, Xiomara Maduro, a atende e reto y e plannan aki andando pa optimalisa e maneho financiero di e pais.

CFT a expresa preocupacion riba e falta di informe financiero oportuno enfatisando cu e ley di LAFT ta exigi cu esakinan ta entrega di manera puntual. Sinembargo Minister demisionario Maduro a reacciona cu tin retraso den e proceso aki, loke ta bin cu e pregunta riba e causanan n’e problemanan aki. Un di e principal factornan cu ta contribui n’e situacion ta e implementacion di proyecto significativo den cuadro di Landspakket. E proyectonan aki ta rekeri no solamente un capacidad considerabel di maneho, sino tambe tempo y recurso adecua pa e por tuma luga.

Den e reciente nota presupuestario, ta presenta un tabel riba pagina 19 cu ta ilustra e proyectonan actual y e evolucion di e sistema di raportahe. E obhetivo ta cu, pa aña 2026, Aruba por presenta informe anual respalda pa un certificacion di un accoutant externo. E certificacion aki ta crucial, ya cu pa garantisa cu e informenan ta refleha e realidad financiero di e pais, proporcionando un nivel di confiansa tanto n’e ciudadanonan como p’e inversionistanan.

E Minister tambe a destaca e importancia di capacita e personal cu ta traha den e area financiero. Consciente cu finansa publico ta un campo complica, e gobierno a implementa un curso digital conoci como e-LOFA, diseña specificamente pa fortalece e habilidad di e funcionarionan publico cu ta maneha finansa di Aruba. E curso aki no solamente lo mehora nan conocemento riba maneho publico, pero tambe lo contribui na un mayor eficiencia den administracion di e recursonan.

E caminda pa mehoracion den e administracion financiero ta largo. E minister a comparti e situacion actual di Aruba cu Hulanda, cu a tarda 20 aña pa alcansa su nivel actual di eficiencia. Aruba, di contrario, a propone a logr’e den un plaso di seis aña, un obhetivo ambicioso cu ta rekeri un compromiso solido y accion coordina.

Fuera di esey, gobierno ta revisando e sistema di subsidio, cu actualmente ta beneficia 46 entidad. E revision aki ta parti di un esfuerso mas amplio pa adapta e leuy relaciona cu subsidio, sigurando p’e ta uza di manera efectivo. Un estudio detaya lo tuma luga pa evalua con lo distribui e subsidionan aki y su impacto den practica, loke lo permiti gobierno realisa cambio segun ta necesario.

E minister tambe a enfatisa e importancia di colaboracion entre e diferente ministerionan. E mehoracion di e maneho financiero pa obhetivo comun. E colaboracion aki no solamente lo facilita e implementacion di reforma, sino cu tambe lo promove un enfoke mas integral pa atende e retonan financiero cu Aruba ta enfrenta.