Connect with us

Minister Ursell Arends: Pabien na Fundacion Movemento Ta Bida

Aruba

Minister Ursell Arends: Pabien na Fundacion Movemento Ta Bida


Ta importante pa nan salud y calidad di bida, cu nos adultonan mayor keda fisicamente y socialmente activo pa mas largo posibel, asina eherce e practica di “active aging”. E no ta secreto cu un persona di edad cu ta mantene su mes activo ta preveni varios malesa y atraso den salud mental y fisico, compara cu si e persona no tabata activo.

Dialuna ultimo, Minister di Asuntonan di Adulto Mayor, Sr. Ursell Arends tabata presente na un actividad di pasco organisa pa Fundacion Movemento ta Bida. Durante e evento aki Minister Arends a haya oportunidad pa hiba palabra na e grupo grandi di miembronan, y a keda masha contento cu e recepcion caluroso. Durante e evento Minister Arends tabata tin e oportunidad tambe di combersa cu varios miembro, pa cual nan luchanan no ta desconoci cerca minister: limitacion di mobilidad, falta di cuido integral, vivienda y costo di bida manehabel ta algun cu pa Minister ta prioridad pa atende cu nan.

Durante su discurso, Minister Arends a subraya riba e importancia pa nos adultonan mayor keda activo mas hopi posibel, no solamente den movecion fisico pero tambe socialmente cu amistadnan. E lasonan di amistad ta prolonga e bon estado di salud mental, y ta pakiko organisacionnan manera Movemento Ta Bida ta hunga un rol asina importante den nos comunidad. Un palabra di felicitacion na e organisacion y tur su miembro nan, pa e bon trabou y esfuerzo continuo pa keda promove e calidad di bida di nos adultonan mayor. Minister Arends a caba na desea cada miembro un Bon Pasco y Prospero Aña 2022.





Source link

Click to comment

Leave a Reply

Your email address will not be published. Required fields are marked *

More in Aruba

To Top