Connect with us

Minister Rocco Tjon: Director di KIA ta keda!

Aruba

Minister Rocco Tjon: Director di KIA ta keda!


Ta for di un tempo cu ta core rumor cu Minister Rocco Tjon tin pensa di core cu su ex-colega y actual director di KIA, Gino Winklaar for di su funcion actual. Sinembargo nunca a bin un aclaracion di parti Minister Tjon riba e asunto aki. Aunke cu Tjon durante su termino cu e tabata lider di fraccion di MEP, tabata un politico semper habri pa entrevista y cla pa aclaria tur situacion, sinembargo a nota un cambio di comportacion. 

Awe porfin a logra haya un entrevista cu Minister Tjon, caminda el a comenta cu; recientemente el a sinta cu sindicato TOPA y e director di KIA y e punto aki no tabata riba mes. Cu esaki, Tjon ta aclaria e rumor y ta confirma cu director di KIA y su ex-colega den KPA, Gino Winklaar ta keda como director. Ex-minister, mr. Andin Bikker a nombra Gino Winklaar como director di KIA dia 7 di juni 2019. Tabata despues cu KIA tabatin casi dos aña sin un director, debi cu e propio minister di husticia actual, e tempo ey a bandona su funcion pa drenta politica despues cu ex-minister, mr. Arthur Dowers(AVP) a nombr’e como director. Tabata riba un 14 di mei 2021 cu a oficialisa e nombracion di Gino Winklaar como director di KIA, conforme un Landsbesluit. 

Gino Winklaar

Gino Winklaar a drenta Cuerpo Policial Aruba dia 1 di juli 2000 y mesora a bay studia na Hulanda pa e puesto di Inspector. Aki na Aruba bek el a traha den diferente funcion, entre otro como “Projectleider” y Hefe suplente den Recherche Samenwerkings Team (RST) pa 5 aña largo. Ey el a conduci varios caso y investigacionnan grandi, den cual a encera crimennan cu ta crusa frontera de Reino Hulandes y tin biaha hasta pa otro paisnan rond mundo. Desde dia 14 di mei 2018 e ta den funcion di “Districtchef” na San Nicolas, den cual su tarea ta pa mantene e operacion diario di henter e districto, incluyendo Polisnan uniforma, recherchenan, e personal administrativo y e departamentonan special cu ta traha for di e Warda di Polis di San Nicolas.

Tocante KIA

Korrectie Instituut Aruba, KIA, a muda pa su localidad na Santo di Patia na San Nicolas dia 22 di september 1990, pues 31 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas o menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.





Source link

Click to comment

Leave a Reply

Your email address will not be published. Required fields are marked *

More in Aruba

To Top