Connect with us

Minister-president a anuncia evento organisa specialmente pa mucha muhe

Aruba

Minister-president a anuncia evento organisa specialmente pa mucha muhe


Dialuna mainta, 13 di juni, a tuma luga na Futura Spaces un conferencia di prensa na unda cu un otro iniciativa di SuperNova pa mucha muhe a wordo anuncia riba e topico di STEM. SuperNova ta contribui na- y stimula Igualdad di Genero cu ta meta number 5 di e Metanan Mundial pa Desaroyo Sostenibel (SDGs) y ta percura pa nos mucha muhenan no keda atras.

Prome Minister Evelyn Wever-Croes, durante conferencia di prensa a enfatisa e importancia y prioridad cu e tin, como hende muhe y como Prome Minister femenino, pa caminda cu ta posibel, crea mas oportunidad y posibilidad pa nos hende muhe y e muchanan muhe. E pandemia a afecta henter mundo pero esunnan mas afecta ta e hende muhe y e muchanan. Riba esaki, Prome Minister a indica, cu mester pone mas atencion pa no perde tur avanse cu hende muhe a logra den pasado.

Prome Minister a remarca cu globalmente, como cu e cuponan di trabou den STEM ta creciendo compara cu otro sector, ta importante pa motiva y prepara nos muchanan muhe tambe pa explora STEM.

“Claro no ta tur mucha muhe lo sigui den e sector di STEM. Pero kisas nos por cende un chispa di interes unico y introduci nan na e sector aki y mustra e muchanan muhe aki cu STEM ta un sector cu ta hopi atractivo y cu por brinda hopi posibilidad pa muchanan muhe tambe.”

Na Aruba specialmente, historicamente e sector of ramo aki ta domina door di hende homber. Pocopoco nos ta mirando si cu esaki ta cambiando, pero ainda nos no por bisa cu nos ta cerca di un balansa. P’esey Gobierno ta sostene e iniciativa di SUPERNOVA aki, y nos ta excited pa e evento aki y ta spera di conta cu participacion di hopi mucha muhe.

E di cuatro evento di SuperNova aki lo ta dia 18 di juni pa mucha muhe entre 6 – 9 aña y e topico lo ta STEM: Ciencia, Tecnologia, Engineria y Matematica.





Source link

More in Aruba

To Top