Connect with us

Minister mester disidí atrobe tokante e dekretonan di e presupuesto di CMC

Korsou

Minister mester disidí atrobe tokante e dekretonan di e presupuesto di CMC


Tokante kiko e kasonan aki ta bai?
CMC ta e hospital nobo na Kòrsou ku ta ofresé kuido for di novèmber 2019. Tur aña CMC ta risibí
un presupuesto di Minister di Salubridat Públiko, Medio Ambiente i Naturalesa. E presupuesto
ta pa kubri e gastunan ku CMC tin na momentu ku ta otorgá kuido na personanan ku tin seguro
di malesa básiko (BVZ). E kasonan aki ta trata e presupuestonan stipulá pa añanan 2020 i 2021.
CMC ta di opinion ku e prespuestonan ta muchu abou i e Minister no ta di akuerdo ku esaki.

Ki interes tin den e kasonan aki?

Si e presupuesto no ser oumentá, CMC ta di opinion ku e kontinuidat di kuido ta na peliger. E
pèrdidanan na CMC ta ser okashoná pa motibu ku den pasado gobièrnu a tuma sierto
desishonnan polítiko tokante lokalidat di e hospital, e tumamentu ofer di personal di Sehos, e
kolaborashon obligatorio ku un laboratorio eksterno i e problemátika di e personanan ku no ta
sigurá. Segun CMC, awor ta e Minister ku, na nòmber di gobièrnu, mester asumí e
konsekuensianan di e desishonnan polítiko aki i no CMC. E Minister ta indiká ku e presupuesto
di CMC ta sali for di e fondo di BVZ. E fondo aki ta ser mantené pa personanan ku ta paga nan
prima i tambe dor di kontribushon di gobièrnu. For di e fondo aki ta finansiá otro kuido tambe,
manera kuido di dòkter di kas i kuido farmaséutiko. E fondo ya ta tin un défisit. Mas presupuesto
pa CMC ta nifiká menos presupuesto pa kuido primario. Si e kuido primario haña menos
presupuesto, e kalidat di esaki por bira menos, loke ta krea mas preshon riba kuido sekundario
na CMC, por ehèmpel. I si e défisit di e fondo sigui oumentá, e sosten di likides di Hulanda ta
kore peliger. E kondishon pa haña mas sosten di likides ta entre otro ku e défisit den e fondonan
sosial no mag sigui oumentá. Segun e Minister, e sosten di likides di Hulanda ta di gran
importansia pa henter pueblo di Kòrsou.

Kiko Korte ta haña di e kasonan aki?
No ta tur argumento di CMC ta sali aprobá. Asina e Minister no mester kompensá tur gastu di
CMC i e Minister mag establesé un grupo di trabou pa avisé tokante e determinashon di e
presupuestonan. E otro argumentonan di CMC si a sali aprobá. Tur aña e Minister ta stipulá e
presupuestonan dor di apliká korekshonnan na e prespuesto ku a ser entregá dor di CMC. E
Minister a risibí konsehonan di SVB tokante e korekshonnan aki i a akseptá e konsehonan di SVB.
Sinembargo, CMC a keda reakshoná riba e konsehonan di SVB tokante e korekshonnan i a
fundamentá dikon e korekshonnan aki no ta korekto. Pa loke ta trata e puntonan di CMC tokante
e korekshonnan ku SVB a konsehá, e Minister mester a reakshoná riba esaki den e dekretonan di
e presupuestonan di 2020 i 2021. E Minister no a hasi esaki. E Minister mester hasi esaki awor
denter di 3 luna. Tambe, e Minister a insertá den e e dekretonan di e presupuesto ku e lo por
determiná ahustenan ku ta trata presupuesto di kuido. Si CMC no kumpli, lo tin ku kòrta den e
prespuesto. Pa esaki no ta eksistí un base legal, pues e Minister no por a hasi esaki. Tambe pa loke
ta trata e deskuento di 12.5% riba e kondishonnan laboral ku e Minister a implementá, tampoko
tin un base legal (ainda). Esaki tambe e Minister no por a hasi. Finalmente e Minister tampoko
por a duna òrdu na CMC pa traha ku e managementtool Performance Efficiency, Resources &
Costs.



Source link

More in Korsou

To Top