Minister Geoffrey Wever a reuni cu International Monetary Fund

Riba 1 di october Minister mr. Geoffrey Wever a reuni cu un delegacion di International Monetary Fund (“IMF”) den cuadro di preparacion pa e proximo Article IV Consultation cu ta programa den 2025. 

Durante un reunion ameno Minister mr. Geoffrey Wever y IMF a elabora riba e maneho y vision cu Ministerio di Asuntonan Economico, Comunicacion y Desaroyo Sostenibel ta bin ta implementando riba entre otro tereno di competencia husto, diversifica Aruba su economia y proyectonan di energia renobabel.

Cu un enfoke riba implementa, Minister mr. Geoffrey Wever a duna IMF un resumen di su maneho y proyectonan den ehecucion.  Pa combati economia informal sector publico y priva ta trahando hunto riba e implementacion di e plan “National Program for Formalizing the Shadow Economy in Aruba” pa garantisa  un “fair-level playing field” den tur mercado. Den cuadro di competencia husto, tambe a elabora riba proceso pa lanta e Aruba Fair Trade Authority cu desde januari 2024 ta operacionalmente independiente di gobierno.

Pa crea mas sectornan economico ta pusha e desaroyo di industria agricola como un pilar di nos economia. Hunto cu Qredits Aruba a crea e “Agri Fund” y “Agri Business Academy”. E fondo pa agricola comercial of “Agri Fund” cu un suma total di 3 miyon florin, ta ofrece financiamento na un interes reduci di 2% pa sumanan entre Afl. 5.000 y Afl. 200.000. E “Agri Business Academy” ta un programa pa (futuro) empresarionan cu kier cuminsa nan propio negoshi of cu tin nan negoshi caba den e sector agricola y ta desea di haya mas conocemento y experiencia den e area di ‘Business Management’.

Pa subi e produccion comercial di webo pa 1.4 miyon den 2026, tin un “Open Call” andando y a instala un wergroep di DEZHI, Santa Rosa y DIP pa traha y implementa maneho. Parti di e maneho aki ta tambe e asistencia di Hulanda pa e desaroyo di e industria agricola comercial. Adicionalmente e nota di maneho “Development of the Orange Economy in San Nicolas” ta den ehecucion desde 2023 unda lo ofrece entre otro un “Creative Business Academy” pa pusha e industria creativo como otro pilar economico. Tambe Minister mr. Geoffrey Wever a elabora riba e potencial y transformacion di FreeZone y e colaboracion cu UN/ ECLAC pa ricibi asistencia pa desaroya e sector “FINTECH”.

Desaroyo sostenibel tambe tawata un tema durante e reunion cu IMF. Pa cu esaki Minister mr. Geoffrey a elabora riba e Plan di Accion 2023-2025: Aruba su transicion pa un modelo economico sostenibel y inclusivo cu ta consisti di diferente proyectonan pa stimula e desaroyo sostenibel di Aruba.

Recientemente, Minister mr. Geoffrey Wever a entrega e prome 4 auto electrico na DEZHI como parti di e programa piloto pa e transicion completo di e fleta di Gobierno pa autonan electrico. E transicion aki tambe ta bay man den man cu instalacion di “EV-chargers” como parti tambe di revitalisa centro di Oranjestad.  Pa baha e consumo di energia, resultado di e scan di edificio di Staten lo sirbi como modelo pa tur edificionan di gobierno y asina contribui pa stimula e “green sector” como sector economico.  

“International Monetary Fund ta un organisacion internacional cu ta evalua e desaroyo di nos pais continuamente y ta importante duna informacion concreto riba loke Aruba ta haci  riba tereno economico y desaroyo sostenibel pa fortifica economia y desaroyo di Aruba cu pasonan concreto”, segun Minister mr. Geoffrey Wever.