Connect with us

Mike Eman: Ta urgi gobierno pa duna atencion na situacion di SERLIMAR

Aruba

Mike Eman: Ta urgi gobierno pa duna atencion na situacion di SERLIMAR


“Den reunion cu Minister President Evelyne Wever Croes riba prespuesto di DOW nos a puntra atencion pa e situacionan manera esun awor na Serlimar. Nos a bai asina leu pa presenta un mocion pa urgi gobierno pa scucha y sinta na mesa cu esnan cu preocupacion”, asina e lider di fraccion di AVP, mr. Mike Eman a expresa.

Eman a referi tambe na contratistanan chikito cu contract di servicio cu DOW, SERLIMAR y Santa Rosa cu pa hopi aña ta haciendo un trabao grandi y importante di limpieza y mantencion rond di nos isla; mantencion di e bunitesa di nos flora, barionan y centronan di ciudad y trabaonan adicional pa cual tanto DOW, SERLIMAR y Santa Rosa ta utiliza nan servicio.

Compensacion y condicionnan di trabao na Serlimar pa empleadonan fiho y pa contratistanan chiquito ultimamente a conoce cambionan cu a afecta nan den un forma cu a perhudica nan nivel di entrada severamente, nan condicionnan di trabao y tambe nan seguridad di entrada mes. Pa e motibo aki e líder di fraccion di AVP, mr. Mike Eman, a presenta den nomber di su fraccion un mocion cu ta urgi gobierno pa atencion urgente pa e situación di contratistanan chiquito. Esaki a tuma lugar durante di e reunion di Parlamento riba e presupuesto di DOW.

Eman a splica den Parlamento cu e Asosacion di Contratistanan Chiquito den representacion di e contratistanan chikito, den cartanan, entre otro di fechanan 19 di November 2020 y 28 di Juni 2021, dirigi na Gobierno di Aruba a pidi atencion urgente pa e forma con empleadonan y contratistanan chiquito ta wordo perhudica.

E mocion di fraccion di AVP ta bisa cu apesar di e peticionan aki di e Asosacion di Contratistanan Chiquito e decisionnan cu ta perhudica empleadonan y e contratistanan chiquito, entre otro cortamento den nan compensacion, dianan di trabao y condicionnan di trabao, ta sigui vigente.

Eman den su declaración a accentua e trabao duro di empleadonan di Serlimar y e contratistanan chiquito cu entradanan margina, cu ta eherciendo trabaonan ehemplar merece un mihor trato y un entrada husto y completo.

E mocion di AVP a urgi gobierno pa mas liher posibel duna atencion na e preocupacionnan y corigi e decisionnan cu ta perhudicando e empleadonan y contratistanan chiquito. E mocion di fraccion di AVP a worde sosteni pa e fraccion di MAS y di ACCION 21, pero e fraccion di MEP y RAIZ a vota contra. 

E líder di AVP, mr. Mike Eman, na final di e reunión di Parlamento a bisa cu apesar cu e coalicion no kier sostene e petición pa gobierno duna atencion na e preocupacionan  di empleadonan y contratistanan chiquito Fraccion di AVP lo sigui lucha pa un trata husto pa e contratistanan chiquito. 





Source link

Click to comment

Leave a Reply

Your email address will not be published. Required fields are marked *

More in Aruba

To Top